Ngigsa 7

Nzambi le vi kundaʼg bigyuu pe naa vi bvura mbvie pe tsiʼg puʼg yé. Ka vi be kile biala na bigyuu ribie, viaʼg kaʼgle lul. Tsiʼg ngkamla.

Tsiʼg mbváʼglá yaʼg wum le lée naa o ke mbpi ndzim. Nzambi mi nlegsi ngyul minlima mimvii ri na ki naa vi bíala na ngyul rinwo pe panʼgu béé si vi mi mbial ñina ri. Aʼg wum le naa vi tsíga mbpi si ñina wum.

Lin vi yí mbiala wanaa, ye dzii naa vi báʼg na bidiu pil mbpi pil, puʼg mafu ma tsiʼg vi nzig ma na mo. Vi di duo mbpi duo. Duo mbpi duo, vi ke bigyúo ri mawula tang ma nkolo. Vi ñul puaʼg madzio duo mbpi duo. Pel ma gi díg sindi, bidiu, madzio, na gyúo, bie yi: nlánga Bibel, magiaʼgle, bvumle Nzambi luanga na bur banʼga.

Si ñina yi na mimbviruʼg. Viog vi ywua na be wung. Vi nung mimbviruʼg pe tsiʼg vii ma duo mbpi duo ri. Vi ñina mam ma bio na mii mavii. Maluo mavii ma gyueʼg mbpi bur bo lui bur banʼga. Vi gyuaʼgra magyuaʼg, hea na mam ma bio bosuo bovii bo sá vi. Vi kieʼgle mfu magyul na gim vii. Vi gyueʼg bongkuendi mapfur ma sui duʼg vii ri.

Mam mañema Nzambi le vi pe sua mimbviruʼg rimie, pe nig maziruʼg pfie, na pe tsendi mam mamvoʼg mavii ri?

Gi mataara, mbpi vi nzí taare lée, a biala na Bibel pe liole vi mam a wúm sá bitsiʼg bivii ri. Lin vi láng Bibel na taare ngkagu ma Nzambi vi kúe tsina, vi ki ñina naa ye tanʼgu bisindi bivii, na ñimle minlima mimvii.

Gi mba, ñe mi nle vi Sindi Ntanea yé, pe naa vi baʼg nambvul giaʼgle Nzambi na gyueʼg mbpi a biangsa vi. Sariye ñimle mabvoʼg mavii, na le vi mbvul tsiʼg mbpi fii, na kuel si ñina naa a tsenda.

Gi nlal, ñe mi nte vi puʼg ma mbvumla. Lin vi bvumle, a lundele minwuma mimvii, na taare na gyuma mapiung vi buama si ñina ri.

Gi nna, ne mi nte vi pe kyual, na ture na vi na be na bur banʼga, na botsir, na si ñe mi nle vi ñina. Vi ywua na suse na bur banʼga hea na si ñe mi nle vi ñina.

Vi ywua na taare langle pil luanga na bur bo bvaʼgla Nzambi na kyual ñe mbpi viog yaʼg. Sá riye le vi mbvul minlima ri, na ñimle vi. Ye sá naa viaʼg dig ke kaʼg ndtieng. Sá riye wo ñinʼga sá bo gio kios ri. Kios aʼg be le numa bur bo ke suala, ka mbvumla bo sá tsina. Kios yi bur bo kyual vi, na kyal Nzambi. Langle pil na bur banʼga bo kyual nzambi ( na láng Bibel, na giaʼgle, na bvumle, na kuelala vi na vi pe tsiʼg mbpi Bibel lée) yi na mala.

Me mi ndzile dzii dzii ka sá bisuala na bokrison banʼga yi na mala. Bibel lée naa e yi sá vi ywua na gia naa vi saʼg. Yesus mi mpeega pe te luanga bur bo kyualala, luanga bur a nzí tanʼgu, a nzí zir wung. Ñe mi nliole ndtimbi riñe na bidiu ñe mi ndi na bosuo bó, na yimbo luanga na bo, na ke bo dig pee bo dzil.

Ka yaʼg kuga le, i mpong ngka gyueʼgle kaʼg ndtande pare mi ntande me gina:

Mur mi nlée pare duo ndzinii na ki naa: “O song pare, miung nwang Pol mvu ma luanga yang na luanga bokrison banʼga. O ywua na ke ñe lée naa a niga vi nzi kue!”

Ki pare aʼg ke bo Pol. Yeri a bvungu mbe, bog na ñe naa a nia.

Ke pan tu mbpi, aʼg kue Pol dzil biala sieʼg ri. Bo dzil namie, yeri bo mese sá minlu pe sumla. Yeri pare ke dzi bebee na Pol ñog aʼg dig yaʼg sieʼg. Mua pil mbpi, yeri pare nung tenaye, ko a vul gia sieʼg bvu ri, ko a kie ye bara makueʼg ri ywa, sueʼg ma bvu. Yeri a mese nlu, ko a pii na gyuo, aʼg zangle. Mua pil mi nke lang, ko gia sieʼg sil dzima, sieʼg kile ná be tsina.

Yeri pare dig Pol, ko a mese nlu. Ko a nung mbvulsieʼg riñe, na nig ñe bvu ritu. Mua pil, ko mbvul sieʼg leg ná. Pare aʼg gyuo, yeri a saʼgse ná nlu kien mafaʼgla, ko a dzioga pe ke.

Vi yi mbvulsieʼg. Ka viaʼg be le bebee na sieʼg, vi ki sil wo, sieʼg vii sil ri dzima. Vi ywua na láng Bibel mvii, giana naa vi giaʼgle na bvumle Nzambi duo mbpi duo, na langle pil na bokrison banʼga. E yi pe naa vi tsiga masusi ri, na sá Nzambi magyueʼg.

Ka vi sá ndzina, Nzambi ki vi ñimle, a ki vi le mbvul, na gyumle vi. A ki le pil naa bur banʼga bo wum kundaʼg puo mbpi vi, vi buma bo kundaʼg puo.