Karakata ium tziman

Dioshitsini intskushini anchitakua ambe ka ishi ushingashi iriekani ima jingoni.[1] Engashi jucha no anchitoka imani anchitakuachani, kokopinchokashi.

Tsipikua kuatsapiti kanikua. Ta kristuni chushapani no mintsikakua mati eshkari jiskangoka ka nomari ukulinchani. Ka dioshi ulutati shupiri juachari mintsitalo ka alititsini eshkashi isherpioka intdeni shupiri tsanga jashini jima papjantdiru engashi japinangaka. Alititsini eshkashi iriekoka eshka neka juchari tsipikua mentdaruni jashi ka no ishi jashi eshka ishu palakpini.

Jimankani engashi jumpbangui japinangantanka, uetalinchashingashi sesi tirieni mentkishi, ma julitikua jimpbo uanikua shangari tirieshingashi. Ka tamu kuishingashi sesi, ka itsimashingashi. Dioshi jingontu ishiti, enga juchashi kolohuaka dioshiri uantdakua, ka komu alini, ka kanikua keri alinishi makeri.

Palakpini kanikua jashi jalati. Kulamingashkashi eshkashi pipingashioka. Juchashi mentkishi jatsioka jashikua ambe juchari mintsitalo matdani pahuani. Eskuacha jimpbo isheshingashi kanikua kuichikuani jangani. Koloshingashi kuichikuani jashi ambe aliparangani. Ishi pikualerashigashi eshka chakakuni ambe ma pamerani ka naki ambetsini kuiripu kulukuntatini atanki. Katambaloshi pikualchashinga kameri ambe. Ishitushi puntsurushinga chipiari ambe enga ualikua jingoni julanka.

¿Ambe jashi anchitakuatsini intskushingui Dioshi enga kutsulintoka jashi ambe, kentitachintsini papku jantdikua ka sesi jakuntani ini palakpinini engatsini uanontdalinka?

Ma puru ambe, ishi eshkashi na uantdontskulini japka, isheratitsini imeri eratsikua dioshiri karakatalo. Engashi kolohuaka dioshiri karakata ka patsani imeri aiokulikuachani mintsitalo, ishi ushingashi kutsulintani juchari eratsikuani ka juchari mintsitacha uingapintashinshi.

Ka tsumo puru ambe, perati juchari inchanguikulini jimpbo espiritu pipingashini, jimpboshishi unka komu alini ka pikualerani engatsini kulachinka. Ishitsini jaluetashini sesi angashulini ka kulanguni ka intskushintsini uingapikua, ishi sesi ka mentdaruni iriekokashi ka jaluetani palakpinini sesi jashintani.

Ka tanipuru ambe, eshkashi keri alioka jimpboshishi jaka. Engashi keri alinka, ima uinirashini juchari tsitikuachani, ka ampbakuntashintsini iamentdu atakata ambe engatsini palakpini uchinka.

Ka tapuru ambe, utitsin parush tsipin ka uekan kuiripuchan, animalichan ka yamind iambe engash intsigak. Jatsishkash par uenan jaman jalan matharu khuiripuch jingon parush tsipikulin ambakit palakpiniol.

Juchaje jankulintani aleta kuiripucha jingoni iriekani engashi jakakunka ka eshenchani Dioshini ishi eshka jucha. Intde ambetsini jaluetashini uingapintani. Pingushitsini engashi kualatsini ishi jamoka. Intdeshi alinganti tiosho. Tiosho no kumanchikua keri mati engashi iamentducha makeri jalanka, o tankulikua ma engashi niranka; tiosho kuiriputi enga uekanka Dioshini ka ishitu juchantsini. Makeri jalani kuiripu jingoni engashi uekanka Dioshini (makeri koloni dioshiri karakata, komu alini, keri alini ka jalueperani mataru ka mataru jingoni iriekani ishi eshka imatsini na alinka Dioshiri karakatalo) intdeshi tsipikuati.

Uanikuashi kulankulishini shani uetalishingui tankulini materu jakakuticha jingoni. Ka Dioshiri karakatatsini alishini eshka sesi jimpbo kanikua uetalishinga. Ta Kristu tsintati ka ishi jahuatati irieta ma ueperakua jingoni: irieta ma jupalintskata ima jingoni ka uinirakata ima jimpbo. Jangashkatarati imeri jankuecha jimpbo tatsikua enga tsintapka, enga tiriepka imeri julenkuliticha jingoni, shangarashpti imecha jingoni ka pulenpioshpti imechari kumanchikualo.

Engashi ampbe utashi no jangashkani jaka, I uantdantskua engatsini tata ma aiankuka uatitsini jaluetani:

Ma shangari, achamashi ma antdaliarashpti tatani ma ka alishpti: "Tata, juchiti erachi pablu jalaritirini jintdini ka iamentdu jakakutichani. ¡Ni uantdontskulikuni sani ka alini eshka jingoka!"

Ima tata nirati Pabluni pulenpini, uamutakushpti ka alingashipti incha.

Enga inchapkia, eshentashpti Pabluni chupiriolo ma erapani jalani uingaptu. Ma pinashku uantdaparatishi, ima tata makeri uashakati pablu jingoni chupiriolo erapani, ishku no iontdani, ima tata jupikatarakua ma pirati, ka pipati tuliri julepitku ma chupiriolo ka ketsikua perati jintiaku enga tsakapu jatantdipka. Eratiti Pabluni ka sanishi terekulini. Ishku no iontdani ima tuliri julepitku iamu tsirapintati ka notaru ma chupiri jingoni jalashptia.

Ima tata eratiti mentdaru Pabluni, kalantati tulirini ka mentdaru kuanipantati chupiriolo, ishku no iontdani ima tuliri mentdaru uinilikulintati chupiri. Ima tata terekuliti sani, eratiti mentdaru Pabluni ka epu manatati eratiparini, jaguarati ka ishi nintati.

Juchashi jintdeshka ima tuliri. Engashi no jahuaka chupiriolo makeri matarucha jingoni, ishku no iontdani iamu tsirapintokashi ka tsitokashi juchari chupiri. Uetalinchashingashi koloni Dioshiri karakata, kuiripini mantdani pahuani dioshini komu alini ka keri alini, ka jankulintani mataru jakakuticha jingoni makeri jalani, ka ishi jalueperanshi mataru ka mataru sesi iriekani ka tsipiparinshi kulachani Dioshini.

Engashi ishi uaka, Dioshitsini jahuatoti, uingaperantotitsini ka uchekuarotitsini. Jimankani ushingashi uantdantani ampbakiti eiankperakua iamentdu imecha jingoni engashi ishi uetalinchani jaka eshka jucha.