الدرس 7

الله بيعطينا أدوات فعّالة بتساعدنا بمعركتنا لنعيش كرمالو. ومن دون هيدي الأدوات منفشل أكيد.

الحياة معقّدة. والدين المسيحي مش دين بيخلّيك مخبّا لحتى ما تتأذى. بالعكس، الله شعّل قلوبنا وطلب منّا إنو نفرجي هيدي الشعلة بالعتمة اللّي خْلِقنا فيا. بيقلّنا إنو نعيش حياتنا الحقيقية بطريقة ما بيتوقّعا العالم.

لمّا منخلق من جديد، منحتاج لتغذية دايمة طول حياتنا. مناكل عدة مرات باليوم، ومننام لساعات طويلة باليوم، ومنشرب كتير مَيّ. والعناصر الروحية الموازية للأكل والمَيّ والنوم هي قراية الكتاب المقدّس والصلاة وعبادة الله مع ناس تانيين.

العالم من حولنا وسخ. بس نحن لازم نكون طاهرين. بينكبّ وسخ على قلوبنا بكلّ يوم من حياتنا. منشوف الانحراف بعيوننا، ومنسمع المسبّات بدينينا، ومنحسّ بوجع الشّوك ولكمات الأصدقاء بإيدَينا، ومندوق السمّ المرّ بلساننا، ومنشمّ ريحة الموت بمناخيرنا.

شو هي الأدوات اللّي بيعطينا ياها الله لنغسل الوسخ ونبعّد العتمة ونغيّر العالم حوالينا؟

أول شي، ومتل ما سبق وذكرنا، الله كشف عن خطّتو لحياتنا بالكتاب المقدّس. ومن خلال قراية نَصّ الكتاب المقدّس وصون وعود الله المذكورة فيه، بتنضف عقولنا وبتقوى قلوبنا.

تاني شي، الله حطّ الروح القدس فينا لنقدر نصلّي لالله ونحسّ فيه لمّا بيستجيب لصلاتنا. وهيدا الشي بيعمّق قناعتنا وبيعطينا القوة لنعيش حياة مختلفة ونساهم بتغيير العالم.

تالت شي، الله خلقنا لنعبدو. ولمّا منعبدو، بيرضي الله رغباتنا وبيبلّش يداوي الجروح اللّي تسبّبلنا فيا العالم.

رابع شي، الله خلقنا لنحبّ الناس والحيوانات والعالم اللّي عطانا ياه ونتنعّم فيُن من دون حدود. لهيك، لازم نعطي الأولوية بحياتنا لنعيش مع أشخاص تانيين ونستمتع بالعالم الطبيعي حوالينا.

لازم نعطي الأولوية لتقضية الوقت مع ناس تانيين بيآمنو باللّه وبيحبّوه متلنا. وهيدا بيشجّعنا وبيقوّينا وبيحمينا من عدم التوازن. هيدي هي الكنيسة. الكنيسة مش المبنى اللّي منلتقي فيه أو القدّاس اللّي منحضرو. الكنيسة هي مجموعة الأشخاص اللّي بيحبّو الله وبيحبّونا. لهيك ضروري نقضّي وقت مع أشخاص تانيين بيحبّو الله (ونقرا الكتاب المقدّس ونصلّي ونعبد الله ونساعد بعضنا لنعيش الحياة اللّي بدّو ياها إلنا الله بحسب الكتاب المقدّس).

كتير ناس بيسألو حالن إذا كان من المهم إنو نلتقي بمسيحيين تانيين. بس الكتاب المقدس بيقول إنو هيدا هو الهدف. يسوع المسيح قام من الموت ليبني مجتمع محبّ، مجتمع طاهر وبيكتفي فيه. وبرهن يسوع المسيح هيدا الشي بعد قيامتو لمّا أكل مع رفقاتو وتمشّى معن وزارن بغُرفن الخاصة.

وإذا كان هيدا الشي مش كافي بالنسبة إلنا، يمكن تساعدنا هيدي القصة المؤثرة اللّي خبّرنا ياها أحد الكهنة:

بيوم من الإيام، قرّب رجّال من خوري وقلّو: "أبونا، خيّي بولس بعّد عني وعن كلّ المسيحيين التانيين. لازم تروح وتحكي معو وتقنعو إنو يرجع!"

راح الخوري على بيت بولس ودقّ الباب وطلب منّو بولس يتفضّل.

بسّ فات عالبيت، لاقى بولس عم يتأمّل بشعلة نار ولعانة. سلّمو على بعض بلا حكي، ورجع قعد الخوري حدّ بولس وصار هو كمان يتأمّل بالنار. بعد شوي، أخذ الخوري ملقط الحديد ولقط جمرة بيضا والعة من النار وحطّا على أرض الحجر برّا النار. هزّ براسو لبولس وابتسم ونطر. بعد كم دقيقة، بردت الجمرة حتّى انطفت النار فيا.

هزّ الخوري براسو لبولس عن جديد، ورجع لقط الجمرة وردّا عالنار. بعد شوي، ولعلت الجمرة من جديد. ضحك الخوري وهزّ براسو لآخر مرّة لبولس وفلّ.

نحن هيدي الجمرة. من دون نار الناس التانيين حوالينا، رح نبرد وننطفي. نحن بحاجة لنقرا الكتاب المقدّس وننمّي عادة ثابتة بالصلاة والعبادة ونعطي الأولوية لإنو نقضي وقت مع مسيحيين تانيين لنساعد بعضنا لنعيش حياة من الفرح والطاعة لالله.

إذا عملنا هيدي الإشيا، الله رح يقوّينا ويشجّعنا ويباركنا. ورح يعطينا بعدا الفرص لنشارك الإنجيل مع الناس اللّي بيحتاجوه قدّ ما نحن منحتاجو.