Karakata ma

Jatsishkashi ampbakiti aiankperakua ambe. Dioshi aiokuliti uekantsini ka puachintantsini, pimutantantsini iamindu kuichikuani jashi ambelo, intskuntsini mentkishi anapu tsipikua ka sesi paparakua ima jingoni, engashi mentkishi mintsingalioka ka kulachani ueperakua jingoni.

¿Jakakushinguiri? Ushinguiri ¿Isheni ambengakini alikuakani jaka?

Dioshiri karakata alishini eshkashi japinangashka parashi uekpini, kulachani ka tsipikulini mentkishi dioshi jingoni, ka noshi ushinga.

¿Andi?

Jimbokashi japinangashinga jalaritini dioshini tsimani jangashkua jimbo.

Uenakua jimbo, noshi mitishinga dioshini, ka noshi uaka uekani nenimani engashi no mitioka.

Ka tsimopuru jimbo, japinangashingashi kuichikuani jashi tsitikua jingoni engatsini tamu ishi panka tsipikualo, no mitini dioshiri ueperakua. Intde kuichikuani jashi tsitikua uantdikpishini, pamenchakuati, no kashumpikuati, kokopakuati, iamintdu kuichikuani jashi pikualarakua ambeti tsipikualo.

¿Naninatsini kuichikuani jashi tsitikua kenditashingui Dioshi jingoni?

Iamintdu ambe no ishenchpikualo uetsishini, ishi jimbo no ushini paperangani, achamashi ma enga mitinka sesi imeri ualitini, ushini isheni enga imeri uantdakuacha, ukuecha ka eratsikuacha jimbo unka no sesi pikuastani. Juchari paperakua dioshi jingontu ishiti. Engashi sandaru mitioka ka andaliarani dioshini, ushingashi sesi kulanguni naninga na juchari kuichikuani jashi ambe jalaritankatsini dioshi jingoni.

¿Ka ambe ushingui dioshi enga juchashi shani jalarinka?

Dioshi pirashpti ka achamashi ma ukulintani ka ishitsini andaliarani ka paperakua jatsini jucha jingoni. Ima achamashi jindeti ta Kristu.

¿Andishi Dioshi jingoni shani ampbakiti ambe achamashi ma ukulintani?

Uenakua jimbo, ishi utitsini mantdani alini andaliarani. Ka tsimopuru ambe, uti iriekani juchari tzipekua, pamelikua ka komu jashikua ambe. Ka tanipuru ambe, pirati ka apopalati juchari kamangalintskua ambe jimankani enga ualika juchantsini jimbo. Ka tapuru ambe, tsintati ka kentitachititsini iamindu kuichikuani jashi ambe, pantatitsini andaliarani ka jatsini paperakua imani jingoni ka intskuntsini mentkishi tsipikua.

Ishiti eshka ta Kristu pirani ka ualini juchantsini jimbo ka isherantsini eshka jukapalakua uerashinga juchari kamangalintskua. Noshi uekashinga eshka Dioshi ishku jurakuaka juchari kamangalintskuani. Ta Kristuri ualikua alikuakashti eshka dioshi no ishku jurakuaka, ima irakuti ishi ualini eshka keri kamangalintsti ma juchari kuichikuani jalati ukuecha jimbo, nakuri ima nomeni uka kamangalintskua ambe.

Imeri eratsikua jindeti pimutantantsini iamendu kuichikuani jashi ambelo ka jumpbangui untani juchari mintsitachani ka ishishi uaka iriekani ka jatsini sesi jashi paperakua ima jingoni. Ishishi alikuakanti enga dioshiri karakata alinka “mentaru uentani japinangani”. Sesi jimbo jumpbangintani, pimutantskatani ka notaru jantspirinia juchari kuichikuani jalati eratsikuacha jimbo ka paperani sesi Dioshi jingoni.

Alikuakashti eshka ampbakiti eiankperakua no jima kamalushini enga ta kristu ishi ualinka eshka keri kamangalintsti ma.

Dioshiri karakata alishini eshka tatsikua enga ta kristu ualipka, ima tsintashka ka jahuarani jima enga ualiricha jalanka ka iashi utashi tsipiti jalati. Aiochishintsini tsipikuachani motakuni ima jingoni: imeri julimpikua ka ampbakiti tsipikua juchari jingoni enga kokopakata jaka. Engashi ishi ushka, imeri espiritu uenoti iriekani jucha jingoni ka sangani alioti motakuni juchari kuichikuani jalati eratsikuachani imeri ampbakikua ka julimpikua jingoni.

Intde ukua enga juchari tsipikua jumpbanguintanka ka julimparangantani alingashini pinpingashi
ungantani. Juchashi julimpintashka mentkishi jimankani jimberi enga juchari tsipikua kamaluakia. Ka intde ukua pinpingashi ungantani mantdani pahuani jucha jingoni iriekati.

Intdeni jashi ambe espiritu pinpingashi kushi intspinti: ueperakua, tsipikua, mintsikulikua, tekontskua, sesi kampikua, ampbakiti kuiripukua, kashumpikua, mintsikakua ka sesi angashulikua. Engashi ta kristuni chushapanka, kuiripini jalashingashi ini ambe jingoni. Engashi no chushapani jaka iashishi uaka tinkuishulini ka andaliantani koloparini dioshiri karakata, notaru jiokulini kamangalintskua, imantku komu alini ka keri alini.

Juchashi no jatsishka imani ambe enga espiritu pinpingashirika. Jimankanitsini intskuati engashi mintsita jingoni uekoka ta Kristuni.

Dioshiri karakata alishini eshkashi apopaloka juchari cruz ka chushapani ta kristuni. Alikuakashi jati eshkashi uantdikuaka juchari ualisikuani. Ishi eshka ta kristu na apopalaka imeri cruz (¡kuichikuani jashi ualikua!), ka chapalatakata ualini, ishishishi uaka juchatu eshka juchari ualisikua ishi ualioka eshka chapalatakata.

¿Antdishi shani uetalinki ishi uni? Jimboka juchari ualisikua pikualerakua kampberashti dioshiri pikualerakuacha jingoni. Ta Kristu uetalinchashini eshkashi jurarkuaka ualisikua ka mintsingalini. Kulachishtitsini eshkashi motakuaka intdeni ualisikua ka sandaru uekani dioshiri pikualarakuachani. Ishi jindeti isherani eshkashi uekashinga, jantspikuni dioshini ka imeri kuiripuni kashumpikua jingoni.

Engashi niantanka dioshi jingoni kulangushingashi eshka imakushi uiniranka juchari mintsitani, imatsini intskushini uingapikua ka ishi tsipikua jingoni kulachani. Ishiti eshka jurakuni eshka jindehuaka ima taliata engashi jirietanka. Piku ta kristuni. Jirieta ta kristuni. Mantani pahuani jimankani jimber engashi kamaroka. Ishi uingapiokashi mintsingalini engatsini alinka eshkashi uekohuaka juchari no ishenchpitichani, imatsini jaluetoti ishi uni.

Juchari paperakua ta kristu jingoni kanikua ishukua jalati ka ushingashi iriekani jimboka juchari inchanguikulini jalati. Ta kristuri paperakua sesi jashi untati shiti tsipikuani, engari mintsingalioka ka kulachani mintsita jingoni. Ka tatsikua engari uakolioka, imakini jahuatantoti.

Uakari uandani jalani eshka ini jashi tsipikua kini kanikua ambe no jurakuati uni ishi eshka tu na pintdeka. Tsipikua jingonguini alioka eshka uekani ka kulachani dioshini iriekashini ma kanikua mintsikulikua ambe ka dioshiri tsipikua juchari iriekualo.

Nakurushi nomeni unka uechukuni kuichikuani jalati eratsikuacha jingoni ka utashishi menguichani no sesi niatani, uekani mintsita jingoni ta kristuni uandikushini intdeni kuichikuani jalati eratsikuachani ka notarushi jatsishini uingapikua. dioshitsini jaluetashini ka ushingashi kanikua tsipini ima jingoni, palakpini jingoni ka iamindu kuiripu jingoni engatsini dioshi intskuka.

Juchashi kanikua no ushinga jakakuni eshka dioshi jumbangui untashinga juchari tsipikuani. Dioshi ushini. Sesi jimbo. Enga no ishipiringa, jimankani ampbakiti eiankperakua no jintdepirini ampbakiti eiankperakua.

¿Andishi shani uani jakakuticha no iriekanki ampbakiti ma tsipikua?

Iamindu jakakuticha uati iriekani eshka neka jumbangui untskata, menguichani juchashishi no uekanka ishi iriekani, jalashini julitikuacha engashi jucha sandaru tsitinka kuichikuani jashi ambe eshka ta kristuni, nakurushi jakakutinkia.

Jalati kuiripu enga no unka iriekani ishi eshka jumbangui untskata, jimboka no jakakushinshi eshka uaka ukulini o eshka dioshi aiokulishka. Ka jalati kuiripu enga no uekanka jimboka jukapalati jumbanguintani. Jatsishini ma sesi jimbo dioshini intskuntani iamindu ambe ka jurarkutakulini dioshi jingoni.

¿Ambe alikuakashingui intde?

Enga juchashi jurarkutakulinkia dioshi jingoni, ushingashi
mentdaru ka mentdaru jurarkutakulini. Ka ishi uetalishini uni mandani pahuani, jimboka engashi no ishi uaka tsitiokashi mentdaru kugantsintani ualisini. Dioshiri karakata alishini eshka juchari kuiripita tsitishinga kamangalintskua. Jima jalashini engashi japinangoka ka jimankani jimberi engashi ualinka.

Engashi jakakuaka ka mintsingalini dioshini, kendikukuni kuichikuani jashi ambeni, komu alini, keri alini, koloni dioshiri karakata ka kunkulintani mataru jakakuticha jingoni, ta kristuri espiritu enga juchari inchaguikurini jaka uenashini jumbangui untani juchari tsitikua ambe ka sangalintsini pimutantani kamangalintskua tsitikualo.

Iondakuliti kuiripini ka jumbanguintani. Ashi tsita mintsingalikua enga jimberi ukulioka ka ashi uantda eshka no uakia ka jurarkuni.

Kashumpini dioshi jingoni juashini tsipikua ka mintsikulikua ma enga sandaru ioni jalanka eshka ishu palakpini anapu ambe. Noshi ishku kendikukushinga kuichikuani jashi ambeni jimboka kuichikuani jashi ambeka, kendikukushingashi jimboka dioshi jindeti engatsini uiniranka tsipikualo.

Dioshi tsini uandapashini anchikulini makeri imeri kerikua jimbo. Enga juchashi jururkutakulinka dioshi jingoni, imatsini jaluetashini intsimpini dioshiri paperakua materucha jingoni, enga jintdeka uandandani ampbakiti eiankperakua, ka isherpini nanina iriekani, enga jintdeka jolentpini.

Shani ampbakishini ima enga tsini dioshi intskunka ka engashi uaka iriekani, noshi ushinga no aiankuani materuchani. Jimankani engashi ishenkia ka pikualarani naka shani sesi ambeka dioshi, sesi jimbo uekokashi aiankuani materuchani eshka imechatushi uaka isheni ka pikualerani indeni jangashkua ka tsipikua engatsini dioshi intskukia.

Ishu jalati mendaru ampbakiti eiankperakua (¡sanderu ampbakiti iamindu ambe jingoni!): Dioshi aiokuliti uekantsini ka tekotsintantsini, intskuntsini mentkishi iriekua, pimutantantsini ka intskuntsini ampbakiti paperakua ima jingoni, enga juchashi mintsingalioka ka kulachani mintsita jingoni. Engashi angashulioka sesi ualikualo jimberi, dioshitsini intskuntoti jumpbangui ma tsipikua enga notaru jatsiokia kuichikuani jashi tsitikua ambe, ni ualikua ka kokopikua, iriekokashi mentkishi dioshi jingoni.

Kuichikuani jashi eiankperakua imati eshka iamindu ima enga no uekoka imani enga dioshi aiokuni jaka pakaroti tsinchitini ka papkjandiru enga nomeni kamaluaka jimboka iamindu kamangalintskua tsini tsichinkualo ka papkandirutsini pashini.

Intde ampbakiti eiankperakua ka kuichikuani jashi eiankperakua enga ukulinka engashi no uekoka ampbakiti eiankperakuani isheranshintsini eshka ampbakiti eiankperakua julimpikuashka ka kanikua uetalishini juchari tsipikualo.

Ushingashi keri alini dioshini jimpboshishi japinangaka ka ishi tsipikulini mentkishi. Menguichanshi eratsishinga eshka uetalishinga erakuni tsipikua ma naninga na jucha uekoka ka materu enga dioshini jaiapanguitaroka. Engashi erakuaka nanika na jucha uekoka no kanikua iontsini tsiperoti. Kuichikuani jashi ambe potitsini komu jashikualo, kokopikua pikualerani mintsitalo ka pintdeni kokopikua ka kamangalintskua ambeku niatani, kuichikuani jashi ambetsini juramuchishini, juchari tsipikua pameshini. Iambetsini iguakulishini ka jintiakutsini jurakushini. Jantspiritsini ushini.

Engashi erakuaka ishekulini eshka neka dioshiri jantspiri imeri ampbakikua jimbo ka noshi jantspirini kamangalintskuari, dioshiri uingapikua ka imeri kerati intsimperakuacha engatsini aiochitini jaka ampbakiti eiankperakualo intskushintsini keri ma tsipikua engatsini nonima uaka iguakulini.

Ka ishi sesi jimbo uetalishini iamentdu. Iamentdu juchari no kulantdarakua dioshiri puantskua jimbo, tsipikua ka imeri ampbakikua ueperakua jingoni.

Ka ushingashi miantani in ambe piriekua ma jimbo enga alingaka: Piriekua ma Pimutanskueri:

Kristu turi ualishka ma kruz jimpo
Ka uingapikua jingoniri tsintashkia
Puachintarini juchiti kamangalintskuechani
Tu jintde juchiti pumutanspiti tata dioshi
Sherentarini ka mentdaru uentarinia untania
Ka jaluetarini iriekani mentkishi tunguini jimpo