Хичээл 4

Энэ хүртэл бид Есүс үхлээрээ дамжуулан юуг гүйцэлдүүлснийг ярилцсан билээ. Түүний өөрийнхөө талаар хэлсэн үгсэд нь итгэвэл бид тэдгээр амлалтуудыг хүртэх эрхтэй болдог. Мөн тэдгээр амлалтууд бидний амьдралд биелэлээ олохын тулд бид өөрсдийн хандлага, зан араншингаа засаж, өөрчлөх ёстой.

Түүний өөрийнхөө талаар болон бидний талаар хэлсэн зүйлийг уншиж, тэдгээрт итгэхээс өөрчлөлт эхэлнэ. Есүсийн бидний талаар хэлсэн зүйлсийг болон өөрийнхөө талаар хэлсэн зүйлсийн харьцуулсан жишээг энд харуулав.

1. Есүс бол бүхэлдээ сайн сайхан. Бид хорон муугаар дүүрэн.
2. Есүс биднийг хайрласан. Бид түүнийг үзэн ядсан.
3. Есүс биднийг сонгосон. Бид түүнээс татгалзсан.
4. Есүс Бурханыг төгс төгөлдрөөр дуулгавартай дагасан. Бид Бурханы дүрмийг эсэргүүцэж боссон.
5. Есүс бидний болон дайснуудынхаа төлөө дуртайяа зовж шаналсан. Бид өөрсдийнхөө хайртай хүмүүсийн төлөө ч зовж шаналахаас татгалздаг.
6. Есүс бол хамгийн агуу үйлчлэгч байсан. Бид үйлчлэхийг бус харин үйлчлүүлэхийг хүсдэг.
7. Есүс үхлээс амилсан. Бид булшиндаа орох тавилантай хэдий ч Есүс бидэнд амь амьдралаа санал болгосон тул найдвар байгаа.

Есүс бол Бурхан, гэхдээ жинхэнэ хүн. Тэр бол амьдарч байсан хамгийн агуу хүн бөгөөд биднийг түүний дайсан байхад хайрлаж, бидний хайрыг эрэлхийлэхийг сонгосон.

Даруу зүрх сэтгэлээр Есүсийн өмнө ирэхгүй л бол хэн ч өөрчлөгдөж чадахгүй. Есүс бол шидэт шившлэг биш. Тэр бидний оюун бодлыг нэг бүрчлэн мэддэг хүн билээ.

Библи дээр Бурхан бардам хүмүүсийг эсэргүүцдэг боловч даруу хүмүүсийг нигүүлсдэг гэж хэлсэн байдаг. Хэрэв бид хүссэн зүйлээ авахын тулд түүнд ойртож Есүсийг ашиглахыг хүсвэл тэр биднийг хэзээ ч хүлээн авахгүй. Бид өөрсдийн бузар мууг үзэн ядаж, түүний сайн сайхан байдлыг бузар муугийнхаа оронд сонгохгүйгээр амлалтынх нь үр шимийг хэзээ ч хүртэхгүй бөгөөд түүнийг таньж мэдэж чадахгүй.

Өөрсдийн бузар муухайдаа гэмших хандлагыг Есүсийн сайн сайхныг мэдэх юмсан гэсэн халуун хүсэлтэй хослуулбал- мөн түүний амлалтуудад итгэвэл- энэ чинь л өнөөх шинэ хүнийхээ амьдралаар амьдарч буй хэрэг юм шүү дээ.Түүний Библид хэлсэн зүйлсийг уншиж, залбирч түүний хүслийг эрэлхийлэх үедээ бидний хадлага бардам байдлаас даруусал руу өөрчлөгдөж байдаг. Ийм маягаар бид түүнтэй улам адилхан болцгоодог.

Есүс бидний зүрх сэтгэлийг хардаг. Бид мууг үзэн ядан жигшиж тэдгээрийнхээ оронд Есүсийн сайн сайхныг хүсэн тэмүүлэх хэрэгтэй. Ийм л хандлагаар бид Есүсийн өмнө гэмшин, уучлал хүсэхэд тэр хүлээн авч уучилдаг.

Бид даруугаар түүн дээр ирэхэд тэр биднийг эмтэрсэн, сул дорой тэр л байдлаар минь хүлээн авч, эмчилж, бүтэн болгохоор ажиллаж эхэлдэг. Бурхан биднийг ямар ч байсан хайрлаж, өөрийнхөө сайн сайхан байдал руу өсгөн төлөвшүүлж, амь, баяр хөөр, хайр өгнө гэдэг үнэнг ойлгож тэр үнэнгээр өөрийнхөө бодит байдалтай нүүр тулсан цагт л бид түүний өмнө жинхэнэ даруугаар ирж чадна.

Бурхан өөрчлөлтийн энэхүү явцдаа биднийг хэрхэн оролцуулж байгаа нь үнэхээр сэтгэл хөдлөм биш байна гэж үү?

Та өөрийнхөө үйлдэж бодож байсан хорон муухайгаасаа ичиж байна уу, сайн хэрэг! Бурхан луу оч. Даруугаар өвдөг сөгдөн өөрийн чинь бодит байдлыг илчилж өгсөнд нь түүнд талархалаа илэрхийлээрэй. Есүс танд хайртай учир таныг зөнд нь орхилгүй өөрчлөгдөж, цэвэр амьдралаар амьдраасай гэж хүсэж байгаа хэрэг юм шүү.

Өөрийн муу муухайгаас эргэн, Есүс рүү очоорой. Библийг бүр шимтэн унш. Өөрийгөө залбиралд зориул. Есүсийн хэн бэ гэдгийг, танд юу амлачихаад байгааг, бас танаар дамжуулан хийнэ гэсэн болгоныг тунгаан бясалга. Мөн түүнд захирагдаарай, ингэснээр та түүний тааллыг олж түүнтэй ойр дотно нөхөрлөж амьдарна. Түүний хайр болон амлалтууд л танд цэвэр ариун амьдралаар амьдрах эрх мэдэл хүчийг өгдөг гэдгийг санаарай.

Энэ бол байнгын, өдөр тутмын үйл явц юм. Мөн хийж чадаагүй үедээ өөрийгөө буруутгах эсвэл найдваргүйдсэн мэдрэмжийн урхинд бүү ороорой. Таны алдаа гаргасан үеүд бол таны Бурханаас дөлөх биш харин ч хамгийн их Бурханд хандах шаардлагатай мөчүүд байдаг. Таны доторх муу муухай чинь Бурхан ч туслаж чадахааргүй их хүчтэй гэсэн ойлголт бол инээдтэй төдийгүй бардам бодол юм. Таныг түүнтэй тэрсэлдэж амьдарч байхад Есүс таныг хайрласан. Одоо та түүний хүүхэд болсон учраас мэдээж тэр таныг уучлах болно! Тэр таны хорон муугаас илүү хүчтэй. Та өөртөө дургүй байсан ч тэр танд хэмжээлшгүй их хайртай . Үүнд итгээрэй, тэгвэл найдвар тасрахгүй.