الدرس 4

لمّا حكينا عن اللّي حقّقو يسوع المسيح بموتو، شفنا إنو الثقة باللّي بيقولو عن حالو بتوصّلنا لوعودو. بس لتتحقّق هيدي الوعود بحياتنا، لازم كمان نغيّر مواقفنا وسلوكنا.

بيبلّش التغيير بإنو نقرا اللّي بيقولو المسيح عن حالو وعنّا وإنو نوثق بهيدا الكلام. وهيدي أمثلة عن اللّي بيقولو يسوع المسيح عن حالو مقابل اللّي بيقولو عنّا.

1. يسوع مليان خير، بس نحن مليانين شرّ.
2. يسوع حبّنا، بس نحن كرهناه.
3. يسوع اختارنا، بس نحن رفضناه.
4. يسوع طاع كلمة الله بالكامل، بس نحن تمرّدنا على قوانين الله.
5. يسوع تعذّب بملء إرادتو كرمال أعداؤه، ونحن من بيناتن، بس نحن ما كنّا مستعدّين إنو نتعذّب حتّى كرمال اللّي منحبّن.
6. يسوع كان الخادم الأعظم، بس نحن ما بدنا نخدُم، بدنا ننخَدَم.
7. يسوع قام من الموت، بس نحن قدرنا إنو نندفن. بس عنّا أمل لإنو يسوع المسيح قدّملنا حياتو.

يسوع هو الله اللّي تجسّد وصار إنسان. هو أعظم رجّال عاش على الأرض، واختار إنو يحبّنا ويسعى ليحصل على محبّتنا بوقت كنّا أعداء إلو.

ما حدا بيقدر يتغيّر بالمسيح إذا ما تقرّب منّو بتواضُع. يسوع المسيح مش تعويذة سحرية، هو شخص بيعرف كلّ فكرة بتمرق ببالنا.

بيقول الكتاب المقدس إنو الله بيعادي المتكبّر وبيعطي الرحمة للمتواضع. إذا تقرّبنا من يسوع المسيح لنستغلّو ونحصل على اللّي بدّنا ياه، ما رح يرحّب فينا أبدًا. ما منقدر نعرف المسيح أو نستفيد من وعودو إلا إذا بعّدنا عن الشرّ اللّي فينا وبلّشنا نكره هيدا الشر ّواخترنا الخير.

وهيدا النّدم على الشرّ والرغبة الكبيرة بإنو نتنعّم بخير يسوع المسيح والثقة القوية بوعودو رح يصيرو الحالة الطبيعية الجديدة بالنسبة إلنا. لمّا منقرا اللّي بيقولو يسوع المسيح بالكتاب المقدّس ومنصلّي ومنطلب إرادتو، بتتغيّر مواقفنا من الكبريا للتّواضع. وساعتا منبلّش نشبه يسوع المسيح.

يسوع بيشوف قلوبنا. لازم نكره الشرّ ونرغب بخيرو ليحلّ مكانو. ساعتا بيقدّملنا يسوع المسيح السماح لمّا منطلبو منو.

لمّا منتقرّب من يسوع المسيح بتواضع حقيقي، بيلاقينا بانكسارنا وبيبلّش يصلّح قلوبنا. إذا كنت بتخجل بالشرّ اللّي فيك، هيدا شي منيح! اركوض لعند الله وانحني بتواضع قدّامو واشكرو لإنو ساعدك لتشوف حقيقتك. وهيدا دليل على إنو يسوع المسيح بيسعى ليتقرّب منّك بمحبة.

قدّيش حلو كيف بيخلّينا الله نشارك بهيدي العملية؟

ولمّا منشوف حالنا بصدق ومنعيش حياتنا بحسب حقيقة إنو الله اختار إنو يحبّنا وإنو ينمّينا بخيرو وإنو الله يعطينا الحياة، رح يعطينا الله الحياة والفرح والمحبة.

بعّد عن الشرّ اللّي فيك، والتفت لعند يسوع المسيح. انغمس بالكتاب المقدّس. انغمس بالصلاة. تأمّل بيسوع المسيح وبوعودو إلك ومن خلالك. سلّم نفسك إلو لترضيه وتعيش بصداقة مقرّبة منّو. تذكّر إنو محبّتو ووعودو هي اللّي بتعطيك القوة والسّلطة لتعيش حياة طاهرة.

هيدي عملية متواصلة ويومية. ولمّا بتفشل، ما تخلّي الشعور بالذنب أو بفقدان الأمل يسيطر عليك. اللحظة اللّي بتفشل فيا هي اللحظة اللّي لازم تلجأ فيا لالله. فكرة إنو الشرّ أقوى من الله فكرة سخيفة ومليانة كبرياء. يسوع المسيح حبّك لمّا كنت عايش بعكس تعاليمو. وأكيد رح يسامحك اليوم بعد ما صرت إبنو! هوّ أقوى من الشرّ اللّي فيك، وبيحبّك أكتر ممّا بتكره نفسك. وثاق بهيدا الشي وما رح تفقد الأمل أبدًا.