Karakata thamu

Engashi jucha uadanka indeni ambe enga ta kristu juapka, imani jimbo enga ima ualipka, isheshkashi eshka imeri kashumbikuari mintsikakua jimbo ushingashi jatsini imeri aiotsperakuechani, ka eshka inderi aiotsperakuechashi uaka sesi jimbo jalani juchari tsipikuecha jimbo uetalishingashi mojtakuni juchari ukuechani ka juchari janguechani.

Inde mojtakukua uenakulishindi alintaparini ka minshikaparini indeni ambe jimbo enga uandanka inderi ambe ka juchari ambe. Ka I jindejtishi maru jangashkakuecha enga ta kristu uandanka imeri ambe ka kanikua mendaruni jashi ambejti juchari ambe jingoni.

1. Ta kristu sesi jimbo pimbingashijti. Juchashi uinirishaka nosesi jashi ambe.
2. Ta kristujtsini uekashimti. Juchashi ikiakushimka.
3. Ta kristujtsini erakujti. Juchashi no jiokulishka.
4. Ta kristu sesi jimbo kulajchashpti dioshini, Juchashi no kulanderakushka ta dioshiri juramukuechani.
5. Ta kristu jindijku uekashpti eshka nosesi k'angapiringa imeri ikiatspiricha jimbo, ka juchajtushi ikiatspirishpka. Juchashi no uekapiringa eshkashi nosesi k'angapiringa utashi imecha jimbo jumberi engashi jucha kanikua uekanka.
6. Ta kristu jindeshpti sandaru k'eri ma jantspiri. Juchashi no uekashinga jantspirini, sandaru sanshi uekashinga eshkashi umingoka ambema.
7. Ta kristu tsintajti enga japka ualiricha jingoni. Juchashi k'uanijpakata jalashka eshkashi niaroka ualikualo ka jatsishkashi ma mintsikakua jimboka ta kristujtsini aiochishati imeri tsipikuani.

Ta kristu jindejti ta dioshi, ka ima sesi jimbo majku jatashati ishini eshka k'uiripucha. Ka nomeni jalashpti achamashi ma sandaru k'eri ma eshka ima, ka ima irakujti uekantsini ka jiringantani juchari uekperacuani engashi jucha jindepka imeri ikiatspiricha.

Nonima uati mojtakukatani ta kristu jimbo enga no andalieroka kashumbikua jingoni. Ta kristu no jindejti shikujperata ambe. Ima k'uiripu majti enga mitika iamindu juchari eratskuechani ambe.

Dioshiri karakatalo alishindi eshka ta dioshi no shangarashinga imecha jingoni engashi no kashumbika, shangarashindi imecha jingoni engashi kashumbinka. Engashi jucha shani jimbojku andalieroka ta kristuni uekaparini eshkajtsini ima intskuaka ambe engashi jucha uekoka, nomenshi sesi erokakatauaka ta kristu jimbo. Jo, engashi no jurajkuaka kuichikuani jashi ambe uni, ka sesi jashi ambeshi erakuni ka jurajkunshi kuichikuani jashi ambe, nomenshi uaka jangashkani ka p'ikualerani indeni aiotsperakuechani.

I eratsikua engashi jucha kuichukuani jashi ambelo k'uitsapinka, majku jashintaparini indeni ambe jingoni engajtsini ta kristu shani tsitinjaka intskuni, ka sesi angashunshi mintsikani imeri aiotsperakuechani, ukulintashindi juchari jumbangui iriekakua. Engashi alintanka ambenga alini jaka dioshiri karakatalo k'omu alishingashi ka jiringantashingashi ambenga uekani jaka eshkashi uaka, juchari jangua mojtakukulishindi sesi ishekulikuani kashumbikua jimbo. Uenashingashi ta kristu jingoni majkunji jashintani.

Ta kristu isheshindi juchari mintsitechani. Uetalishindi eshkashi k'uiripioka ka ikiakunshi nosesi jashi ambeni ka tsitinshi eshka imeri intsimperakua juchantsini jingoni jauaka. Majkani engashi kulakuaka ta kristuni eshkajtsini p'uachintoka ima ishi uati.

Engashi jucha sesi jimbo kashumbiparini andalieranka imani. K'apendulikatajtsini ishentashindi, ka ishi jimbo uenashindi mendaru untouani juchari mintsitechani. Jimajkanshi k'oru ushinga ishekulini eshkashi sesi jimboshi jamani jaka ka iriekashingashi juchari tsipikuani indeni julimbikua jingoni engajtsini ta dioshi irakuka ka eshkajtsini uekoka ka k'uiriperantsini imeri ambakiti k'uiripukualo, engajtsini ta dioshi intskuni jalanka tsipikua, tsipinchakua ka uekperakua.

¿No sesi jashishki na engajtsini p'imalinka eshkashi majk'eri uaka indeni anmbe?

Engari k'uratsinka chiti nosesi ukuecha jimbo, majkani uiria andalierani imani. Kashumbikua jingoni tinguishuli ka dioshi meiamukua intskuntsi engakini isherantaka julimbikua chiti tsipikualo jimbojku. Indeni ambe jimbo shalarashindi eshkakini ta kristu uekapari jiringantashaka.

Jurajkua chiti nosesi ukuechani, ka andalientani ja sandaru sani ta kristuni. Inchatsi sandaru dioshiri karakatalo. K'omu alikualo sesi inchami. Eratsikuntsi indeni ambe neshki ta kristu ka indentu enga ima aiokulitinijaka chiti tsipikualo uni ka t'unguini jimbo. Andaliera imani ka ishiri uni jauaka jaiapanguintarani ka sesi pajperaparini iriekani imani jingoni. Miantsi eshka imeri uekperakua ka imeri aiotsperakuecha jindeshkashi engakini intskunka uingapikua ka sesikua eshkari iriekani jauaka iriekua pimbingashi ma.

Alikuakashati eshkashi mentku ishi uni jauaka pauani ka pauani. Engakini no sesi nichoka, ashi jurajkutakuli eshkakini k'amangalintskua ongoka ka nijtu eratsikua ambe jimbo engakini kuichikuani p'ikuastani jalanka. Jimajkani engakini nosesi nichinka ambema jimajkanishindi engari jatsinka eshkari sandaru jiringantokata Dioshini. Engari t'u eratsinka eshka chiti nosesi ukuechashi sandaru uingapishka eshka dioshi no sesi eratsikuajti ka sesi ishekulikua. Ta kristukini uekashapti jimajkani engari t'u iriekani japka ikiakuparini. Ka iashi engari imeri uajpekia imachkakini p'uchintoti. Ima sandaru uingapijti eshka chiti nosesi ukuecha, ka t'uri no jamberi shani uekakulishinga eshkakini ima t'unguini nashani uekanka. Minshika indeni ambe ka nori tsitoka indeni mintsikakuani.