Karakata tziman

¿Ambe jimbo niarashpki ualini ta kristu ma krusi jimbo?

Engashi no uandashka ambe jimbo, dioshiri ambakiti aiotsperakua no ma ambe maluauati.

Mapuru ambe jimbojkushishi uaka jangashkani, enga jindeka dioshini kulajchapari. Dioshi uandashini eshka ima uekashpka mitini juchari tsipikuechani sesi jimbo ka tatsikua ualini juchantsini jimbo ka eshkashi uejchakukulini japiringa iamindu kamangalintskuechani, ka eshkashi upiringa ta kristuni andalientani, ka eshka andapiringa juchari uekperakuani ka un jalanshi maluakuni.

¿Andishi ishi ualipki eshka na ualipka? Jimboka ishi erakushpka.

Dioshi uandashini eshka tsipikua iuliriolo jalashka. Puantskua jimajkankushi jalanti enga iuliri pinbingashi tsitanganka, ka iuliri pimbingashijkushi uati intspini tsipikua mentkishi anapu jimboka no shukajchakata jalashka ualicha jimbo. Ishi jimboshi ta kristu machakuajku ma achamashi pimbingashi, erakukulishpti ualini juchantsini jimbo.

Dioshi iamindu uandantskualo aiokulishpti eshka ualipiringa juchantsini jimbo. Enga ta kristu iriekapka ishu palakpinini imani ambe enga na uandakata japka dioshiri uandakua paricha jimbo shalatashapti eshka dioshiri aiotsperakuecha sesi jimboshka, eshkashi sesi jimbo upiringa mintsikani. Ka ishi jimbo, ta kristu jukari 300 ambe iriekashpti eshka dioshiri uandakua paricha na uandapka enga ima notki andajpinumka.

Jucha je isheni maru ambe jimbo enga ta kristu erakupka ualin.

1. Ualishpti ka pentantantsini dioshi jinkoni.
2. Imeri espiritujtsini tsipikua intskushini, enga mirikulinka juchari nosesi jashi ukuechani jumbanguerantashindijtsini imeri espiritu jimbo.
3. Ima nosesi k'angashpi juchari k'amangalintskua jimbo, ka imeri nosesi k'angua jimboshi jatsishka pinandikua ka ambakintskua.
4. Imeri kulanderakua ujti eshka ukulipiringa eshka na uandakata japka.
5. Meiampichijtijtsini juchari k'antsperata dioshi jingoni, enga ima chapalatangapka krusiolo, meiamuntaparini dioshini.
6. Ima jurajkuntskatashpti ka eshkashi jucha ishentskatapiringa.
7. Ima sesi jimbo intspijti imeri tsipikua ka eshkashi jucha upiringa p'irani imeri tsipikuani. Ka ishijtsini aiochishati ma tsipikuechani mojtakuani -- imeri tsipikuani juchari tsipikua jingoni.
8. Imajtsini isherashindi nani enga na upka jurajkuni iamu ambe isheraparintsini eshka julashpka palakpinini ambakerantani.
9. Ima p'irajti imani engashi jucha nosesi k'angapiringa enga ima jima krusiolo chapalatangaca ka ishishi jucha no nosesi k'angani ka notarushi jantsipini nosesi jashi amberi.
10. Ima jatsintajti imani enga adani sherepka . Adani, achati enga dioshi uenapka uni, noma kuichikuani jashi eratsikua jingoni andajpinushpti, ka palakpiniolo janoshpti ualikua imeri nosesi ukuecha jimbo, ta kristu noma kuichikuani jashi eratsikua jingoni andajpinushpti, ka imeri ualikua ka imeri pimbingashikua jimbo juajti tsipikua palakpiniolo.
11. Ima jindejti uenakualo anapu ka k'amalukualo anapu, ka imani jimboshi iamindu tsipikua jalanjati.
12. Ima tsemujti ualikuani ka eshkashi jucha tsemupiringa tsipikuani, najkuru ima no uetalinchamka ishi uni, iamindu indeni ambe ushpti ka ishi shalatani jalani eshka jatsishka juramukua iamindu ambe jimbo.
13. Jindeshpti sandaru k'eri ma jantspiri, intspiparini tsipikua imeri ikiatspirichani jimbo. Ka ishi uparini shalatashindi imeri ambakiti uekperakuani sandaru eshka mataru jashi ukuecha jimbo.
14. Imeri iuliri ambakiti ambakerantashindi juchari p'amenchakuani ka tsipikua mentkishi anapujtsini intskushindi.

Na shani k'eri ambeka enga ukata jaka inde allotsperakuecha. ¿ambejtsini alikuekashaki juchantsini?

Dioshi uandashindi eshka engashinga mintsikanka eshka ta Kristu ualishka ka iamindu ambe uni juchantsini jimbo, ushingashi p'ikualerani imani andakuani enga ima andaka. Ta Kristu p'irajti juchari nosesi k'anguani ka ishishi jucha kuajchakukata jalani indeni nosesi jashi ambe jimbo.[20] Inde aiotsperakuajtsini intskushindi ma mintsikakua eshka engashi ishentanka tsipikua ka sesi p'ikualerakua ta kristuni jingoni, uingapikuajtsini intskushindi eshkashi kulajchoka ka uekanshi, ka notarushi jurajkutskulini nosesi jashi ambe jimbo.

Noshi uetalishinga nosesi p'ikualerani indeni kuichikuani jashi ambe jimbo engashi jucha no uni jalanka jurajkuni . Ta kristu meiampijtia indeni k'antsperatani ishi jimbo dioshijtsini pimbingashi untani jalashindi. I aiotsperakuajtsini mintsikakua intskushindi eshkajtsini nombema uaka jalaritani ta kristu jingoni.

Dioshiri intsimperakua jimboshi p'imutantskatashka, no ukuecha jimbo, ka noshi uaka sesi ishekulini juchari uingapikuecha jimbo. Najkuru ishi, enga juchashi sesi jimbo mojtakukulinka salatashingashi eska inde uekperakua ka mintsikakua dioshi jingoni sesi jimboshka. Ishi eshka, achati ma enga uandanka eshka uekashinga inderi ualitini ka nomeni sani olejtani ka nijtu sesi k'amanki, shalatashati eshka no sesi jimbo uekashinga. Imeri iriekakua jimbo ushindi eshka imeri uandakuechashi no jukapaloka najkuru ima p'ikualeranka sani ambema imani jimbo.

Juchari mintsikakua enga jindeka dioshi ka imeri aiotsperakua jimbo intskuni jalashindijtsini uingapikua enga jimbo juchashi uetalinchani jalanka eshkashi uni jauaka iriekani indeni tsipikuani engajtsini ima kulachini jaka eshkashi iriekoka. Dioshiri karakatajtsini alishindi eshka indeni ambe espiritu pimbingashi jimbojkushi ukulinka ka eshka espiritu pimbingashi jindeshka juchari mintsikakua, ka eshkashi ta kristurishkia eshkashi ishekatechauakia ambakerantskatecha ta kristu ualikua jimbo.

Engashi jucha mintsikanka ta kristni imajtsini uingapikua intskushindi ka ishishi shalatani jalani neshinguishi sesi jimbo ta kristu uajpecha no k'amangalintaparini iriekani. Ka no alikuekashati eshkashi pimbingashishkia, sandaru sani alikuekashati, engashi ta kristu jingoni iriekani jaka dioshijtsini pimbingajkuntani jalashindi.

Ka engashi sesi angashulitini jauaka, sesi jimboshi pinbingashintoka engashi dioshiri olepatini jimbo jauaka.

Ta kristu uandajti eshkashi jucha ishishinga eshka shiliandikua uvashiri. Engashi jucha andalietanka imani, uenashingashi maluatani imeri tsipikuani ishi eshka uvashi ambe enga shiliandikualo jukarini jalanka, imeri shiranguechajtsini tsipikua intskushindi ka juletashindijtsini k'uiripini ka dioshijtsini majku jatashindi karushani ka eshkashi jucha ambakiti amangenchakua intspioka. Ka inde amangenchakuecha engajtsini juletanka k'uiripini jindejtishi, uekperakua, tsipinchakua, pinandikua, tekontkua, uekperakua, no ualisikua, no ikiani, sesi p'ikualerakua, ka julenani p'ingukulini.

Enga juchari tsipikuecha mojtakukataka dioshiri espiritu jimbo indeni jimbo enga juchashi mintsikanka eska ta kristu julashpka ka ualini juchantsini jimbo, majka inde mojtakukua jimbo engashi juchari tsipikulo shalatanka shalarashindi eshka juchari jakajkukua sesi jimboshka. Inde aiotsperakuechajtsini mintsikakua intskushindi eshka enga ima uka imeri ualikua jingoni juchari ambeshka..

Dioshiri espiritujtsini no p'ijpantashindi engashi jucha juchari uingapikua jingoni uekoka p'ingukulini ka pinandikuashi jatsini, no indejtsinishi p'ijpantoti , ka engashi jucha noma amangenchakua intspiparini iriekani jaka, uetalioti eshkashi ishekulioka sesi jimboshi jindeshkia ta kristuri.

Imeri iuliri jindejti itsi, ka juchari tsipikuechashi jindejti shiliandikuecha. Enga jimbo ta kristu intspinka t'intskua ka unshi sesi jakajkuni ka sesishi tsirini.