Ngigsa 4

Lin vi nzí tande mam Yesus mi nsa lang sui ñe mi nyu ri, vi nñina naa lin vi bvaʼgla mam a lée dig ñelepfuo, ye sá naa mam ñe mi nkag, viog yaʼg vi búama mo. Di pe naa ngkagu riñe lundala bitsiʼg bivii ri, vi ywua na tsendi mabuangsa mavii na minsea mimvii.

Mataara ma tsina yi naa o láng na bvaʼgla mam Yesus lée dig ñelepfuo, na mam a lée dig vi. Mandtimbi mandzinii ma mam Yesus lée dig ñelepfuo; na mo a lée dig vi, maa mana:

1. Yesus yi mbpa, mandzima mandzima.[3] Viog vi yi nlunda na bio.
2. Yesus mi nkyual vi. Viog mi nzinde ñe.
3. Yesus mi mpee vi. Viog laga ri na ñe.
4. Yesus mi nsa Nzambi magyeʼg manzi momea ri. Viog vi bina ri mbpinda ma Nzambi.
5. Yesus mere mí nwum pfuga puʼg ma bosiang bó, vilebopfuo vi bieʼg luanga bosiang ribo. Viog mi mpongle wum pfuga to puʼg ma bur vi kyúal.
6. Yesus wo yí mfuuri mí mbalee gianda. Viog viaʼg kyual le gianda di vi kyual naa bur bo gíanda puʼg vii.
7. Yesus mi mvu pee boyul. Viog vi yi naa vi ki dzi masuong ritu.

Yesus yi Nzambi, di ñe yi yaʼg mur. Ñe wo balee be muraʼg mur luanga bur bo ntsiʼg ma si ñina ri, di ñe mi nkyual vi hea a ke sueʼg na kyual vi. Viog vi biéʼg bosiang bó.

Tomur aʼg be le nambvul sii bebee na Yesus ka mur riñe aʼg sil le ñul si. Yesus aʼg be le ndtande ma magik. A yi mur límbo mabuangsa mbpi mabuangsa vi bir.

Bible lée naa Yesus vumla na bur bo buaʼg minlima. Di a le bur bo sil mañul si mbpam nwó. Ka vi sii bebee na Yesus pe biala na ñe mbpi mpfuʼg, aʼg kaʼgle vi miaʼgle naduo bebee na ñe. Ka viaʼg gir le bio, zinde bio, na pee na vi sá mbpa, viaʼg kaʼgle buama kundaʼg bomam ñe mí nkag vi naduo.

Be na mabuangsa ma zinde bio, puaʼg nwuma buama mbpam ma Yesus, zangle ngkagu nwó na puaʼg mabvoʼg. Ye wo ywúa na be tsiʼg vii wanaa. Lin vi láng mam ñe lée Bibel ri, lin vi giaʼgle na gia nwuma nwó, mabuangsa mavii maʼg be le ná mo ma pfumbo, ma zirga mo ma nsila ñul si. O ywa, vi taare viaʼg giga ñe.

Lin vi dzii Yesus naa a kíera vi, yaʼg kuga le. A ñina minlima mimvii. Vi ywua na gig zinde bio, na wum naa mbpam ma Nzambi wo nunga dzi.

Lin vi ke pfuna na Nzambi na pueʼgpueʼg nsila ñul si, to vi mbe kile ná be na mabvoʼg; To vi ngiama ma dzimle mabvoʼg, a nzi lar na vi, tsina a taare na gyuma minlima mimvii. Lin vi ñina mam vi bieʼg tsiriri, na tsiʼg bitsiʼg bivii pueʼgpueʼg ritu, ñi lée nakinaa Nzambi mi mpee naa a kyual vi, na sá naa vi lúnga kyual yé ritu; o ywa Nzambi le vi tsiʼg, masusi, hea na kyual.

Kaʼg ñenge nsea, lin Nzambi sá naa vi núnga ngkoo na lab vi lab na ye gina?

Ka ywe gyueʼg suen na bio ywe sá, kundaʼg lab béé! Kanda mpfunde bo Nzambi. Pfura mabuong si, sila ywelepfuo si, o laʼg ñe awa na ñe na liole ywe pueʼgpueʼg ma sá yí ywe ñul ri. Ndzina wum lée naa Yesus leble ywe kyual ritu.

Vuʼg bio ri, kanda bo Yesus. Gibla ywelepfuo Bibel ritu. Nia magiaʼgle ri. Buangsa nze yí Yesus, sá ñe kag naa a sá tsig ye ri, na mo a biala na ywe pe sá. Sila ywelepfuo si sueʼg nwó pe susgu ñe na pe be na kundaʼg nlar na ñe. Buangsa naa kyual yé na ngkagu nwó bie yi mam ma le ywe tsiʼg na tuu pe tsíʼg tsiʼg yí wung.

E yi lab seega pil mbpi pil, duo mbpi duo. Ka o kyu, ywaʼg dig linga naa o simsa, o be kile ná be na mabvoʼg. Lin o kyu wo ye balee mere dzii naa o sía bebee na Nzambi. Lin o buangsa naa bio yi na mbvul bal Nzambi, kaʼg piʼg riñe sá suen, a vu mbuaga nlima ri. Yesus mi nkyual ywe lin ywe mi nzinde ñe. A yi na mbvul kiere ywe koo dziiri, mbpi ywe nzirga ma mua nwó! A yi na mbvul, bal bio, a kyual ywe bal zinde ywe zínde ywelepfuo. Bvaʼgla ndzina, nlima kaʼgle ywe bil na tiaʼg.