Mësimi 8

Bibla quhet Fjala e Perëndisë sepse është mënyra e Perëndisë për të shpjeguar se kush është Ai, kush jemi ne, nga kemi ardhur dhe pse ekzistojmë. Ajo është komplekse. Nëse hapim Biblat tona në një vend të rastësishëm dhe fillojmë të lexojmë, ka të ngjarë të ngatërrohemi. Kjo ndodh sepse Bibla përbëhet në të vërtetë nga 66 libra të veçantë të shkruar nga autorë të ndryshëm gjatë një periudhe prej rreth 2000 vjetësh.

Librat e Biblës u frymëzuan nga Perëndia. Përtej kësaj, Perëndia konfirmoi se përmbajtja e librave është e vërtetë dhe ata vijnë prej Tij. Shumë nga librat ishin të destinuar për grupe specifike njerëzish. Kisha e hershme i mblodhi dhe i organizoi këta libra në një vëllim të vetëm që tani e quajmë Bibla. Së bashku, ata tregojnë se si Perëndia ka ndërvepruar me njeriun përgjatë historisë.

Librat e Biblës janë shkruar në zhanre të ndryshme. Libri i Psalmeve, për shembull, është një libër këngësh dhe lutjesh. Ai është plot me metafora që nuk duhen marrë gjithmonë fjalë për fjalë. Ndërsa Ungjilli i Gjonit është një vepër historike e bazuar në jetën e Jezusit.

Letrat, si ajo drejtuar Galatasve dhe Efesianëve, ishin letra të shkruara nga udhëheqësit e kishës së hershme drejtuar grupeve të caktuara të njerëzve.

Ka libra profetikë, si Isaia dhe libri i Zbulesës—një profeci e gjatë dhe komplekse që u shkrua fillimisht për kishën e hershme të krishterë.

Ka më shumë, por besoj e kupton ku dua të dal.

Bibla është gjithashtu e ndarë në dy dhiata. Dhiata e Vjetër përbëhet nga libra të shkruar para lindjes së Jezusit dhe Dhiata e Re përmban libra të shkruar pas lindjes së Jezusit.

Pesë librat e parë të Biblës (Pentatuku) u shkruan nga dhe për izraelitët për të shpjeguar fillimin e botës, premtimet e Perëndisë ndaj tyre, dhe se si Ai i formoi ata si komb.

Ka marrëveshje të ndryshme midis Perëndisë dhe njerëzve nëpër të gjithë Biblën. Këto quhen besëlidhje. Sot ne jetojmë nën besëlidhjen e Jezusit. Kjo do të thotë që ne nuk jemi të detyruar të ndjekim ligjet ceremoniale të detajuara në librat si Levitiku apo Ligji i Përtërirë, të cilat ishin nën një nga besëlidhjet e vjetra të Perëndisë me popullin hebre. Ligjet ceremoniale funksiononin si simbole që tregonin drejt Jezusit, kështu që ligjet ceremoniale u përmbushën nga jeta dhe vdekja e Tij.

Nëse po të vjen mendja rrotull, ndalu për një moment dhe merr frymë. Pastaj merr kurajë sepse nuk është e nevojshme ta kuptosh të gjithën tani!

Bibla nuk është diçka që duhet ta lexosh me detyrim, si detyrë. Është diçka që ke privilegjin ta lexosh. Ajo është menduar të lexohet me gëzim, të studiohet dhe të jetohet gjatë të gjithë jetës. Është një thesar që do të transformojë mendjen dhe zemrën tënde.

Disa pjesë të Biblës janë më të lehta për t'u kuptuar se të tjerat. Ne të sugjerojmë të fillosh duke lexuar librin e Zanafillës (libri i parë në Bibël), dhe të paktën një nga katër Ungjijtë (Mateu, Marku, Luka, ose Gjoni).

Nga aty, mund të ketë kuptim të vazhdosh me Eksodin, së bashku me Veprat e Apostujve dhe Letrat në Dhiatën e Re.

Romakëve dhe Hebrenjve janë dy libra që janë të vështirë për t'u lexuar, por megjithatë ata ndihmojnë të kuptojmë dallimin midis besëlidhjes së re të Jezusit dhe besëlidhjeve të vjetra në Dhiatën e Vjetër.

Ka shumë histori magjepsëse në Bibël. Ka gjithashtu edhe pjesë me gjenealogji të hollësishme dhe ligje të ndërlikuara për popullin hebre. Megjithatë, mund të jesh i sigurt se çdo pjesë e Biblës ka një qëllim të mirë dhe ia vlen të studiohet, sepse Bibla na ndihmon të kuptojmë se kush jemi ne, kush është Ai dhe si të jetojmë. Ajo na ruan nga e keqja. Prandaj, duhet të jesh i kujdesshëm ndaj çdo gjëje që të pengon vazhdimisht ta lexosh Biblën. Telefoni, lojërat elektronike etj.

Nëse nuk ke Bibël, duhet ta marrësh një.

Ka plane për leximin e të gjithë Biblës brenda një viti, dhe këto janë të dobishme sepse të ndihmojnë të lexosh pjesë të vogla çdo ditë.

Nëse do të lexosh shumë, vazhdo. Por është më mirë të përqendrohesh që të mësosh se si ta shijosh Fjalën e Perëndisë. Ajo është një burim i vazhdueshëm inkurajimi dhe urtësie, dhe aftësia jote për të jetuar jetën e krishterë është e lidhur drejtpërdrejt me atë se sa vazhdimisht e studion Biblën me zemrën dhe mendjen tënde.

Kërkoji Perëndisë të të ndihmojë të kuptosh Biblën. Kërkoji Atij të të ndihmojë të zbatosh urdhërimet e Tij në jetën tënde të përditshme. Mos e lër pas dore leximin dhe dëgjimin e saj. Mos e lejo veten ta harrosh atë. Mund të mendosh se nuk je lexues, por Bibla do të bëhet shpejt pasuria jote më e çmuar sepse ajo përmban fjalët e Perëndisë që të drejtohen ty.