الدرس 8

الكتاب المقدّس إسمو كمان "كلمة الله" لإنو الوسيلة اللّي بيفسّرلنا فيا الله مين هو ومين نحن ومن وين جينا وليش خلقنا. هو كتاب معقّد. إذا فتحنا صفحة عشوائية وبلّشنا نقرا، عالأرجح رح نضيع. والسبب إنو الكتاب المقدّس هو بالحقيقة عبارة عن 66 كتاب منفصلين. وبتعود هيدي الكتب لأشخاص مختلفين كتبوها على مدى ألفين سنة تقريبًا.

الكتب اللّي بيتألّف منا الكتاب المقدّس مستوحاة من الله، وأكتر من هيك: الله أكّد على إنو محتويات الكتب حقيقية وإنّا منو. وكان كتير منّا موجّه لمجموعات محددة من الأشخاص. وجمعت أوّل كنيسة هيدي الكتب ورتّبتا بكتاب واحد منسمّيه اليوم الكتاب المقدّس. وبتفرجينا هيدي الكتب مجتمعة كيف تفاعل الله مع الإنسان على مرّ التاريخ.

انكتبت الأجزاء المختلفة من الكتاب المقدّس بأساليب مختلفة. كتاب المزامير مثلًا هو كتاب تراتيل وصلوات، ومليان صور بيانية ما لازم تتفسّر دايمًا بشكل حرفي. أما إنجيل يوحنا، فهو عمل تاريخي مبني على حياة يسوع المسيح.

كتب أوّل قادة للكنيسة الرسايل الموجهة لمجموعات محددة من الأشخاص، متل أهل غلاطية وأهل أفسس مثلًا.

وفي كمان كتب عن النبوءات، متل إشعياء وكتاب الرؤيا، وهو عبارة عن نبوءة طويلة ومعقّدة كتبتا بالأساس أول كنيسة مسيحية.

وفي كتب تانية كمان، بسّ فهمت الفكرة.

بينقسم الكتاب المقدّس كمان لعهدين. بيتألف العهد القديم من الكتب المكتوبة قبل ولادة يسوع المسيح، وبيتضمن العهد الجديد الكتب المكتوبة بعد ولادتو.

انكتبت أوّل خمس كتب من الكتاب المقدّس (التوراة) من قِبل بني إسرائيل ولإلن، وكان الهدف منا تفسير بداية العالم ووعود الله لإلن وكيف عمل منّن أمّة.

وفي عدة اتفاقيات بين الله والبشر بالكتاب المقدس، وإسما عهود. ونحن منعيش اليوم بموجب عهد يسوع المسيح. وهيدا بيعني إنو مش مطلوب منّا نتبع القوانين الشعائرية المفصّلة بكتب متل سِفر اللاويين أو سِفر التثنية، اللي كانو ضمن أحد عهود الله القديمة مع الشعب اليهودي. كانت هيدي القوانين الشعائرية إشارات ليسوع المسيح، واكتملت بحياتو وموتو.

إذا حاسس حالك ضايع، وقّف للحظة لتاخذ نفس عميق، ومن بعدا تشجّع لإنو مش مطلوب منّك تفهم الكتاب المقدّس كلّو من هلّق!

قراية الكتاب المقدّس مش واجب. هي فرصة حلوة مفروض تعطينا الفرح لمّا منقراه أو مندرسو أو منعيشو طول حياتنا. هو كنز رح يغيّر تفكيرك وقلبك.

في أجزاء من الكتاب المقدّس أسهل من غيرا، ولهيك منقترح إنو تبلّش بقراية سِفر التكوين (وهو الكتاب الأول بالكتاب المقدس)، وعلى الأقل إنجيل واحد من الأناجيل الأربعة (متّى أو مرقس أو لوقا أو يوحنا).

من بعدا، يمكن يكون من المنطق إنو تنتقل لسِفر الخروج، وأعمال الرّسل والرسايل الموجودة بالعهد الجديد.

الرسايل لأهل رومية والرسايل للعبرانيين هي عبارة عن كتابين قرايتن صعبة، بس رح يساعدوك لتميّز بين عهد يسوع المسيح الجديد والعهود القديمة الموجودة بالعهد القديم.

بيتضمن الكتاب المقدّس كتير قصص رائعة، بالإضافة لأقسام بتفرجي السلالات والقوانين المعقّدة للشعب اليهودي. بس الأكيد إنو كلّ جزء من الكتاب المقدّس إلو هدف حلو وبيستحقّ القراية. بيساعدنا الكتاب المقدّس لنفهم مين نحن، ومين هو الله، وكيف لازم نعيش. الكتاب المقدّس بيبعّدنا عن الشرّ. لهيك، لازم تتجنّب أي شي بيلهيك دايمًا عن قراية الكتاب المقدّس، متل التّلفون أو ألعاب الفيديو أو غيرا.

إذا ما عندك نسخة من الكتاب المقدّس، لازم تجيب وحدة.

وفي خطط انحطّت لقراية الكتاب المقدّس بكاملو بسنة وحدة، وهي مفيدة لإنا بتساعدك لتقرا مقاطع قصيرة كل يوم. أما إذا كنت حابب تقرا أكتر، فما تتردّد.

بس من الأفضل إنو تركّز على إنو تتعلّم لحتى تتمتّع بكلمة الله. هي مصدر مستمرّ من التشجيع والحكمة. وقدرتك إنو تعيش الحياة المسيحية بترتبط مباشرةً بالتزامك الثابت بالتفاعل مع الكتاب المقدّس بقلبك وبعقلك.

طلوب من الله إنو يساعدك على فهم الكتاب المقدّس. طلوب منو إنو يساعدك على تطبيق أوامرو بحياتك اليومية. وما تهمل قراية الكتاب المقدّس أو سماعو. ما تسمح لنفسك إنو تنساه. يمكن تفكّر إنك ما بتحبّ القراية، بس الكتاب المقدّس رح يصير بسرعة أغلى شي عندك لإنو كلمة الله إلك.