الدرس 8

الكتاب المقدس اسمه كلمة الله لأنه طريقة الله إنه يشرح مين هو، ومين إحنا، وجينا منين، وليه إحنا موجودين. الموضوع معقد. لو فتحنا كتابنا المقدس على أي صفحة عشوائية وابتدينا نقرا، يمكن نتحير. ودا لأن الكتاب المقدس عبارة عن 66 سفر منفصل كتبهم مؤلفين مختلفين على مدار فترة طولها 2000 سنة تقريبًا.

أسفار الكتاب المقدس موحى بيها من الله. وأكتر من كدة كمان، الله أكد إن محتويات الأسفار حقيقية، وإنها جاية منه. كتير من الأسفار كان مقصود بيها فئات خاصة جدًا من الناس. الكنيسة الأولى جمعت الأسفار دي ورتبتها في كتاب واحد، وهو اللي بنسميه النهاردة الكتاب المقدس. وكل الأسفار دي مع بعض بتبين إزاي الله تفاعل مع الإنسان على مدار التاريخ.

أسفار الكتاب المقدس اتكتبت بألوان أدبية مختلفة. سفر المزامير مثلاً هو كتاب للترانيم والصلاة. ومليان بالمجازات اللي مش مقصود تتاخد دايمًا بالمعنى الحرفي. لكن إنجيل يوحنا هو عمل تاريخي قايم على حياة يسوع.

الرسائل، زي غلاطية وأفسس، كانوا جوابات كتبوها قادة الكنيسة الأولى لفئات معينة من الناس.

وفيه أسفار نبوية، زي إشعياء وسفر الرؤيا - ودي نبوة طويلة معقدة اتكتبت أصلاً للكنيسة المسيحية الأولى.

وفيه أكتر، بس انت وصلتك الفكرة.

الكتاب المقدس كمان مقسوم عهدين. العهد القديم بيتكون من الأسفار المكتوبة قبل ميلاد يسوع، والعهد الجديد فيه الأسفار المكتوبة بعد ميلاد يسوع.

أول خمس أسفار من الكتاب المقدس (التوراة) اتكتبوا على إيد الإسرائيليين وليهم لشرح بدايات العالم، ووعود الله ليهم، وإزاي هو عملهم كأمة.

وفيه اتفاقات مختلفة بين الله والشعب بطول الكتاب المقدس. ودي اسمها عهود. النهاردة إحنا عايشين تحت عهد يسوع. ودا معناه إننا مش مطالبين نتبع النواميس الاحتفالية اللي جت تفاصيلها في أسفار زي اللاويين أو التثنية، واللي كانت تحت واحد من عهود الله القديمة مع الشعب اليهودي. النواميس الاحتفالية كانت نافعة كرموز بتشاور على يسوع، بحيث إن النواميس الاحتفالية دي اكتملت بحياته وموته.

لو اتلخبطت، خد نفسك للحظة. وبعدين اتشجع لأنك مش محتاج تفهم كل حاجة دلوقتي حالاً!

الكتاب المقدس مش حاجة لازم تقراها، زي الواجب. دي حاجة إنت اللي بتبقى عايز تقراها. المقصود منها إنها تبقى فرحة - بتتقري وبتتدرس وبتتعاش على مدار الحياة. دا كنز هيحول ذهنك وقلبك.

بعض أجزاء الكتاب المقدس أسهل في فهمها من أجزاء تانية. بنقترح إنك تبتدي بقراءة سفر التكوين (أول سفر في الكتاب المقدس)، وعلى الأقل واحد من الأناجيل الأربعة (متى، مرقس، لوقا، يوحنا).

وبعد كدة، جايز من المنطقي إنك تقرا الخروج، مع سفر أعمال الرسل والرسائل في العهد الجديد.

رسائل رومية والعبرانيين سفرين صعب قراءتهم، لكن هيساعدوك تفهم الفرق بين العهد الجديد ليسوع والعهود القديمة في العهد القديم.

فيه قصص كتير شيقة في الكتاب المقدس. كمان فيه أجزاء مفصلة عن سلاسل الأنساب والنواميس المعقدة للشعب اليهودي. لكن تأكد إن كل حرف في الكتاب المقدس ليه غرض صالح ويستاهل الدراسة لأن الكتاب المقدس بيساعدنا نفهم إحنا مين، والله مين، وإزاي نعيش. هو بيحافظ علينا من الشر. وعلشان كدة لازم تحرَّص من أي حاجة بتمنعك دايمًا من إنك تقرا كتابك المقدس. تليفونك، ألعاب الفيديو، إلخ.

لو مش عندك كتاب مقدس، لازم تجيب واحد.

فيه خطط لقراءة الكتاب المقدس كله في سنة واحدة، ودي مفيدة لأنها بتخليك تقرا أجزاء صغيرة كل يوم.

ولو عايز تقرا كتير، اعمل كدة. لكن الأفضل إنك تركز إنك تتعلم إزاي تتلذذ بكلمة الله. لأنها مصدر دائم للتشجيع والحكمة، وقدرتك على إنك تعيش الحياة المسيحية مرتبطة ارتباط مباشر بمواظبتك على التفاعل مع الكتاب المقدس بقلبك وعقلك.

اطلب من الله إنه يساعدك تفهم الكتاب المقدس. اطلب منه يساعدك إزاي تطبق وصاياه على حياتك اليومية. ما تهملش قراءته والاستماع ليه. ما تسمحش لنفسك تنساه. يمكن تفتكر نفسك مش بتحب القراءة، لكن الكتاب المقدس هيكون هو أكتر حاجة ثمينة بتمتلكها لأنه هو كلمات الله ليك.