Karakata ium tanimu

Inde karakata alingashindi Dioshiri uandakua jimboka ishi jashi jimbo ta Dioshi isherpishati neshki sesi jimbo ima, ka neshkishi jucha, ka nani ueratini julashakishi ka andishishi iriekanijaki. No kani jangashkulishindi. Engashi p'irakuaka dioshiri karakatani nani uejkini ka uenanishi alintani, uakashi no jangashkani ambe, jimbojti jimboka dioshiri karakatalo karakata jalajtishi 66 karakatecha tachani jalati kararicha jingoni ka 2000 ueshulini ishijtia enga karangantaka.

Dioshiri uingapikua jimboshi uti karangantani I dioshiri karakatecha. Ka Dioshi sesi jimbo uandantashindi eshka enga jimini karakata jaka sesi jimboshka ka eshka imani jimboshi julanijaka, uanikua karakatechashi jalashpti maru k'uiripuchari jajkiolo, ka ima k'uiripucha engashi uenapka ta Kristuni chushapani t'antoshptishi uanikua karakatechani ka majk'erishi pentouashpti engashi iashi ishi mitiouakia eshka dioshiri karakata. Jimini shalarashindi nani enga na ta Dioshi juletopka k'uiripuchani indeni shani iopalari uandantskualo.

Inde karakatecha Dioshiri karakatalo anapucha mamaru karakata jalajtishi, eshka ari karakata piriekuechari, jindejti ma karakata piriekuechari ka k'omu akuechari. Uinirishati kanikua amberi enga no mentkishi unka ukulini eshka na karakata jaka. Ka eshka ari ta sani juanuri karakata, jindejti ma karantskata enga uandantanka ta Kristuri iriekakuani.

Karakatecha, eshka Galatacha, ka Efesiocha karakatashptishi imani k'uiripucha jimbo engashi olejtsikumka imani k'uiripucha jingoni engashi uenamka ta Kristuni chushapani ka k'uiripu erakukatachanishi karakuashimti.

Jalajtishi karakatecha Dioshi uandakua parichari, eshka Isaiashiri, ka eshka Jangashkakuechari, Dioshiri uandakua iopalari ma engashi no kani uni jalanka jangashkani engashi imecha karamingapka k'uiripucha engashi uenani japka ta Kristuni chushapani.

Uanikuatarushi jalajti, ka t'uri jangashkashakaia.

Dioshiri karakata alukukata jalajti tsimani aiotsperakuacha jimbo. Iontki anapu aiotsperakua karakata jalajti jimajkani anapu ambe enga ta Kristu notki andajpinumka. Ka jumbangui aiotsperakualo anapu karakatechashi karakatejti tatsikua enga ta Kristu japinangapkia.

Iumu karakatecaha engashi jaka uenakulini jamani Dioshiri karakatalo. [Pentateuko alikata] Israeli anapuchashi karamingashpti, engashi jimbo aiangungapiringa nanina uenakulishpki palakpini. Aiotsperakua ambe enga Dioshi ukuapka ka naninga na untopka eshka k'eri ma irieta.

Ini Dioshiri karakatalo shalarashindi eshka Dioshi ka k'uiripuchashi ushpka mamaru jalati pakatperakuechani. Engashi alinganka pakatperakuecha. Iashishi iriekashaka ta Kristuri pakatperakua jimbo. Inde alikuekashati eshkajtsini nonima uaka aiokulirani eshkashi iriekoka indeni juramukuecha jingoni enga Levitikuchari ka Deuterenomiolo uandani jaka, engashi jaka iontki anapu pakatperakualo ma Dioshiri, judea anapu k'uiripucha jingoni, inde juramukuecha jimbo enga jimajkani ishi ukulimka indeni ambe jimboshi isherpini jalashimpti ta Kristuni. Ka k'amakushpti shalarani ta Kristuri tsipikua ka ualikua jimbo.

Engari uintsamingalini jaka, angashuli sonditu ka jirienguntsi ma. Ka jangulints, nori jatsishka eshkari ma jimbojku iamindu ambe jangashkoka iashi.

Dioshiri karakata no jindejti ma karakata engari t'u jatsika eshkari alintoka jimbokakini nema alishaka eshkari alintoka. Jindejti ambe engari t'u uakari alintani jalani, jimbojti eshkari t'u tsipini jauaka, alintaparini, julengulikatajti ka iriekakatajti iamindu tsipikuecha jimbo jindejti kanikua ambakiti ambe engakini mojtakuchoka chiti eratsikuani ka chiti mintsitani.

Marushi Dioshiri karakatalo anapu karakatecha sandaru no uni jalashindi jangashkakulini eshka matarucha. Engakshini alinka eshkari uenoka alintani Genesishiri karakatani, (enga uenakualo jaka Dioshiri karakatalo) O machakua ma indeni t'amu karakatechari Dioshiri aiotsperakuari engashi jindeka, (Mateu, Markushi, Lukashi, ka Juanu).

Ka jimini ueratinia, sandaru saniri jangashkokia engari alintoka Exoduni, ka jiminkishi alintaniri ukuechani ka indeni Karatsperakuechani Jumbangui aiotsperakualo anapuchani.

Romanucha ka Hebreucha jindejtishi maru karakatecha engashi sani no uni jalanka jangashkani, ka jindejtishi maru karakatecha engajtsini juletanka jangashkani indeni jumbangui pakatperakua ta Kristurini ka imani iontki anapu pakatperakuechani ka aiotsperakuechani.

Uanikua uandantskua sesi jalatachashi jalajti Dioshiri karakatalo. Ka jalajtishi mataru karakatecha ka juramukuecha engashi irieta judiucha no kani unka jangashkani. Ka najkuru, ishi uakari sesi jimbo isheni eshka mandani alini dioshiri karakatecha sesi jashi ambe erokaparini karakateshka ka kanikuas esijti julengulini jimbokajtsini dioshiri karakata juletashindi jangashkani neshkishi jucha, ka neshki ima ka naninashi ua iriekani. Kuichikuani jashi ambelojtsini kenditashindi. Jimborishi jingontku jauaka ambema jingoni engakini no jurajkunka eshkari alintoka dioshi karakatani. C'hiti celulari video juegucha, ka mataru ambe.

Engari no jatsika Dioshiri karakata ma, uetalishindi eshkari pioka ma.

Jalajti ma ambe enga unka eshkashi alintoka iamindu Dioshiri karakatani ma ueshulini jimbo, ka julejpishindi jimboka ushindi eshkari pauani ka pauani alintani jauaka meni sani ka meni sani, engari uekoka kanikua alintani, alintachka.

Najkuru sandaru sesika alintani sani, ka jangashkani ashpimuparini Dioshi karakatani. Jindejti ma itsi uerakua enga mentku ishi uerani jalanka tsipikua ka julengua, ka eshka t'u uaka iriekani ta kristuri shangarolo jalajti jiminimindu engari t'u alintanka Dioshiri karakatani c'hiti mintsita jingoni, ka c'hiti eratsikua jingon.

Kulaku dioshini eshkakini juletoka jangashkani dioshiri karakatani. Kulaku eshkakini juletoka uni imeri juamukuechani pauani ka pauani c'hiti tsipikualo. Ashi jurajku alintani ka koloni ashi juraku eshkari mirikulioka t'uri uaka uandani eshkari no alintsti mashka, ka Dioshiri karakata ukulintashindi kokani ishi ma ambe engari t'u sandaru uekanka jimboka jindejti dioshiri uandakuecha engakini uandajpanka.