Ngigsa 8

Bo gio Bibel naa bang ma Nzambi, nagi a gigsi nze yí Nzambi, bonze vi yi, ye vi vu, na puʼg gi vi yi pe o si. Bibel ngkamla. Ka vi kee ñe bel tsina vi taare na láng, mabuangsa ma ki vi be naa bvinda bvinda. Nagi Bibel bir bikalar 66 biaʼg be le yiguʼg vur, bur bvubvu mí ntsile bie. Ye mi nung mimbvu bebee 2.000 pe sil ñe tsile.

Bikalar bi Bibel bie vu bo Nzambi. Nzambi mere ki naa mam ma yí ntsila tsina ma yi pueʼgpueʼg, hea ma vu bo ñe. Bikalar bvubvu luanga riye mi ntsíleo puʼg ma ndzima luanga bur. Kios mataara mi nsil bie suala pe naa ye báʼg kalar vur na vur, ye vi gio dol naa Bibel. Lin bo nsil ma suala bikalar ribie, ye liole mbpiñie Nzambi mi nsá mam na mua mur taare mafu pfie.

Bikalar bi Bibel bie yi ntsila makaʼg makaʼg. Kalar Bosom yi kalar bigia na magiaʼgle. E yi nlunda na biyiguʼg bi mam. Ywaʼg ywua le na kee gyueʼg biyiguʼg biywema bvuo na bvuo. Kalar Jean mí ntsile yog yi ndtande tsiʼg ma Yesus.

Bikalar biog, mbpi Galat na Efezien, mi mbe bikalar botio sueʼg bo kios mataara mí ntsile ndzima biluanga bi bur.

Bikalar bi mpaga malab biog, mbpi Ezai, ka naa Apokalips yí muraʼg mpaga malab ngkamla bvubvu, bie mi ntaare tsileo puʼg ma kios mataara.

O ngyueʼg naa bikalar bi Bibel bie yi ntsila makaʼg makaʼg.

Bibel bir yaʼg minlar mimba. Nlar ntulii bir bikalar mi ntsileo sueʼg naa Yesus Krist bial. Nlar wanaa nwog bir bikalar mi ntsileo pfie mabiala ma Yesus.

Bikalar bitan mataara bi Bibel, bur bo Izrael mi ntsile bie puʼg ma bur bo Izrael. Ye mi mbe pe gigsi bur ndtande ma si ñina, ngkagu Nzambi mi nsá bo, hea mbpi ñe mi nsá naa bo baʼg ndzima kaʼg.

Bur benoo Nzambi mi nkyu tsiung puaʼg binuma Bibel ri. Nkyua tsiung rinwo, bo gio nwo naa minlar. Dol, vi tsiʼg nlar ma Yesus ri. Ndzina wum lée naa yaʼg be le nñimla naa vi lebla mambpinda ma dig matsinde ma yi bikalar mbpi Levitik ka deteronom ri. Bie mi ndig ndig nlar yí pfie bvubvu paʼgla ma Nzambi na boyuden. Mambpinda rimo ma yi mbpi mandtimbi ma mam mi ndig ndig Yesus; ndzina wum lée naa ma mi nlundeleo na tsiʼg, hea na sui ma Yesus.

Ka o ñina naa mam mana ma bal ywe, pong wara, o yoa. Nunga mbvul, nagi ñindi aʼg be le naa o sila gyueʼg mam momea kien vur!

Bibel aʼg be le sá o ywua na láng, mpi sá ki naa bo tsindele ywe. E yi maʼg puʼg ye naa o baʼg nambvul láng ñe, gig ñe, na sá mpi a dzii nakepan mafaʼgla ma tsiʼg ye. A yi sá kulaa yí nambvul tsendi sindi ye hea na nlima nwo.

Ndzima binuma bi Bibel bie yi bvugbvu pe gyueʼg bal binʼga. Me lio ywe naa o taara na láng kalar Mataara (ma Bibel). O láng yaʼg ri kalar to vur luanga Bikalar bi Kundaʼg Puo (Matieu, Mark, Lukas, Ka naa Zang).

Pfie riye, e yi mbpa naa o kanda sueʼg o nzieʼg láng Kalar Mintueʼg, Minsea Minluma, hea na Bikalar mi ntsileo Nlar Wanaa ri.

Romen benoo Hebreu bo ngkamla pe láng. Di bie yi na mala pe gueʼg ngkoo yí paʼgla ma nlar wanaa ma Yesus, hea na nlar ntulii.

Bibel bir puaʼg biñenge bindtande. A bir yaʼg bindtande bo tande kile be na muʼg, hea na mambpinda ma ngkamla mí nleo boyuden. Di, limba naa piaga mbpi piaga riye mi ntsíleo na ndzima puʼg, ye ywua na lángoo. Nagi Bibel kuel vi naa vi gyuga bonze vi yí, hea na mbpiñie vi ywua na tsiʼg. A vul vi bio ri. Sariye o ywua na kiloo na sá yiyia sá naa o baʼg kile láng Bibel. Telefon nwo, masong biyiguʼg, na mam manʼga mafii.

Ka ywaʼg be le na Bibel, o ywua na ke ñe giaga.

Mam ma dungee mbpiñie o yí nambvul láng ma ki ywe kuel bvubvu nagi ye sá naa o lánga buang bitsil buang bitsil duo mbpi duo.

Di ka o wum láng bal ywa, kaʼg sueʼg na láng. Di e yi mbpa naa o giga láng na gyueʼg bang ma Nzambi. Pil mbpi pil, ye le mbvul nlima ri, ye le piʼg. Sá ki sá naa o limba tsiʼg mbpi krison ki vu kaʼg kyual o kyual láng Bibel ri na nlima nwo nwuywua, na mabuangsa mo momea.

Dzia Nzambi naa a kuela ywe naa o gyuga Bibel. Dzia ñe naa a kuela ywe naa o yimba leble mambpinda mó duo mbpi duo tsiʼg ye ri. Ywaʼg dig wusa láng na gyueʼg. Ywaʼg dig kiamsa wusa Bibel. E yi nambvul be naa ywaʼg kee le kyual láng tsiʼg ye ri. Bibel fang zirga sá balee kulaa puʼg ye, nagi a bir bibang bi Nzambi puʼg ye.