Karakata 9

Komu alani jintdeti Dioshi jingoni uantdontskulini.

Ta Kristu alitatspishpti nanina komu alani ima jingoni enga alingaka "Tata juchari", Mateulo 6:9-13. Ishi alitakushpti imeri julenkulitini ma enga ima kulamalipka nanina komu alani.

Ka ishitu, mamaru jashi jalati nanina komu alani, ishi eshkashi na mamaru jashi ambe uantdontskulinka juchari paperakuecha jingoni. Ushingashi komu alani kuiripucha jimpbo. Ushingashi komu alani juchantsini jimpbo, ushingashi kulakuni eshkatsini kuachakuaka, ampbakuntantsini, uingapikua ka sesi eratsikua jimpbo. Ushingashi dioshi meiamukua intskuntani jimpboka ampbakiti ma dioshishka, imeri pamokukua ka puantskua jimpbo. Ushingashi uantdontskulikuni ampbenshishi uekanki. Ushingashi Dioshi meiamukua alini jimpbokatsini intskushini. Ka ishitu aiankukulini juchari uantdanguiotu ambe, cheta ambe, no jangashkua ambe ka engashi no uni jalanka kulankuni.

¡Yamentdu I ampbakiti ambeti!

Ta Kristu tsitishini eshkari ishi komu alioka eshkari na pikualerani jaka. Ima mititi shiti eratsikuachani. Komu ali iamentdu mintsita jingoni. Antdaliera kashumpikua jingoni, Dioshi meiamukua intskuntaparini ka mintsikakua jingoni.

Komu ali ka talata shiti jakichani, keskutini o kamapalikulitini. Komu ali mingalitini o eskatini. Shangaraparini, angantitini, uashakatini, tinkuishulitini o apontitini. Komu ali tsipakueri, churikua, chatinikuari o iamentdu julitikua.

Ashi jiringatsi kerati uantdakuechani. Dioshi jingoni no uetalishini shani kerati uantdakuecha. Ima santderu mititi eshka tu. Shantku ishi ali eshkari na pikualerani jaka ka uantdontskuliku jagangalikua jingoni. Mintsika eshka ima koloshi jaka shiti komu akuani ka eshka sesi jimpbo tsitishinga tu jingoni jalani.

Komu ali jintiaku ka ishitu makeri materucha jingoni. Komu alini makeri kanikua sesi jalati. Makeritsini untashini ka Dioshi tsitishini ishi.

Ashi cheli kuiripuni enga tsitinka ka sesi pikualerani uingachani komu alani. Komu alani no ishiti eshka jucha na sesi ishioka. Santdaru jintdeti sesi jimpbo antdaliarani dioshini ka intskuntani iamentdu juchari mintsita. Enga nenima no jaiapanguitoka ka teresmaluni shiti komu akuani ima santdaru uetalinchashti julenkulini eshka tu. Shalatashti eshka no kashumpishka, ka no kashumpikua kuichikuani jashiti.

Iamentdu jakakutichashi uetalinchashini kaskuni sesi jimpbo komu alani. Alikuakashi jati tamu niarani sontditu mantdani pahuani ka komu alani. Engari no ishi uaka, komu akua ambe nonehuati shiti tsipikualo. Engari no pintdeka komu alani, sesi jahuati engari uenoka eratsini komu alani sontditu, kanikua sesi jalashini tsipkuchani komu alani, ka ishi uenakuni julitikuani. Naki ambe santderu sesi pikualerakuli eshka churikua kumo alani, jimpboka kuetaratini jalashinia ma ka santderu maretaru ambe miantani jalani. Komu alani motakushini julitikuani sesi jashi ambe jingoni.

Uakari alukuni ambe ma nanina komu alani. Menguichani sesi jalashini karani ambe jimpbo komu alani, ishi uakari ishepani imani engari karaka ka ishi komu alani.

Ishukshini isheroka ma nanina alukuni ka ishi komu alani: uenani jamani, aianku shiti kamangalintskuachani ka kulaku eshkakin puachintoka. Ka tatsikua, Dioshi meiamukua intskuntsi imeri ampbakikua jimpbo, engakini puachintaka, engakini sesi kamanka ka uekankini. Sontditu pirieku imeri mintsingalikua ka uingapikua jimpbo. Komu ali shiti kuripuni ka pichipiricha jimpbo. Sontditu pinashku ka ishku jala, erokuli eshkakini dioshi uantdapoka. Ka tatsikua, komu ali eshkakini intskuaka uingapikua iamentdu julitikua.

Dioshiri karakatatutsini jaluetashini nanina komu alani. Ushingashi alintani o koloni dioshiri karakata, tatsikua uantdontskulini Dioshi jingoni imani ambe engashi koloka o alintani, kulakuni eshkatsini jaluetoka kulankuni imani ambe engashi no uni jaka kulankuni.

Sesi jashi ambe uni iontdashini pintdekulini. Tekontsi ka jankulintsi. Jintiaku tekontsi. Ka ashi shepi.

Tatsikua engari jankulintoka komu alani sontditu mantdani pahuani, ishentokari eshkari tsitioka ka uakari iopalarani komu alani. I kanikua ampbakiti ambeti. Ishiokari eshka kanikua sesi ambeshka alukuni sesi nanina komu alani. Ishi ushingashi kentditani uantdanguiota ka no jangashkueni pikualerakua ambe.

Jangulintashingashi komu alani, ishi eshka ueperakua jimpbo, jangulintokashi jimpboka ishishi unti ukulini.

Ishokari, engari aiokulioka jangulintani, eshkari isani uaka iopalarani komu alani, ¡ka tsitiokari! Jimpbokashi uetalinchashinga komu alani. Jiringantashingashi Dioshi jingoni sesi paperani santderu eshka marutaru ambe. Ka ima sesi paperakua Dioshi jingoni jumpbanguitsini untashini.

Dioshitsini ioalishti komu alani. Tsitishini eshkashi uantdontskulioka ima jingoni. Dioshi jingoni uantdontskuilini uinirashini juchari mintsitani ishi eshka marutaru ambe na no uaka. Engashi jucha no kumo auaka, juchashishi no eshenchakulini jalanka ka imechani engashi jucha uekonhuanka. Jucha je antdaliarani Dioshini, jurakuni eshkatsini uingaperantoka ka jaluetani mantdani pahuani.

Ima tsitishini uinirantsini ka sesi pikuatstantsini jucha jingoni japarini. Uekashini tu jingoni jalani jimpboka ishi mitiokari sesi ka tsipiokari.

Tamu pera sontditu dioshi jingoni julitikualo, o julitikuecha nitamapoti. Engari jurarkuntoka komu alani, niaroti julitikua engari kuetaroka, ka tsinchikualo antdatserokari. Ka engari mintsingalioka ka komu alini sesi jimpbo, Dioshikini jaluetantoti santderu kanikua eshka engari tu upiringa eratsini o isheni.

¿Mitishpkiri eshka Dioshi komu alashinga tunguini jimpbo?