الدرس 9

الصلاة هي الكلام مع الله.

يسوع قدم لنا نموذج بسيط لكدة في ما نسميه "الصلاة الربانية" اللي جت في متى 6: 9-13. الصلاة دي كانت إجابة على واحد من أصدقائه لما سأله إزاي نصلي.

لكن فيه أنواع مختلفة من الصلاة، زي ما فيه أنواع مختلفة من المحادثات مع الأصدقاء. ممكن نصلي لأجل الناس الآخرين. ممكن نصلي لنفسنا. ممكن نطلب الحماية والشفاء والقوة والحكمة. ممكن نشكر الله على صلاحه ورحمته ومغفرته. ممكن نقول له على اللي بنحبه. ممكن نشكره على اللي هو اداهولنا. أو نقول له همومنا ومخاوفنا وشكوكنا وأسئلتنا.

كل دا كويس!

الله مهتم إنك تصلي بأمانة. هو عارف أفكارك. صلي من كل قلبك. قرب منه باتضاع وشكر وثقة.

صلي وإيديك مرفوعة أو على حجرك أو مربعة. صلي وعينيك مفتوحة أو مغمضة. امشي، اقف، اقعد، انحني، أو ارقد. صلي الصبح أو بالليل أو بعد الظهر أو طول اليوم.

ما تحاولش تبدو عميق. الله مش مهتم بالكلمات الرنانة. هو عارف أكتر منك. خليك على طبيعتك. كون نفسك واتكلم مع الله باحترام. ثق إنه عايز يسمع صلاتك، وإنه فعلاً حابب يكون معاك.

صلي بنفسك ومع الناس. الصلاة مع بعض مهمة! لأنها بتقربنا من بعض وبترضي الله.

ما تخافش من الناس التانية اللي بيرتاحوا أكتر يصلوا بصوت عالي. الصلاة مش علشان احنا مين. الصلاة علشان نقرب أكتر من الله وإحنا بنعبر له عن اللي في قلوبنا. لو حد قلل من طريقة صلاتك، فدا بيبين كتير عنه هو مش عنك انت. بيبين غرور، والغرور شر.

كل مسيحي لازم يكوِّن عادة صلاة باجتهاد. دا معناه تحديد ميعاد كل يوم للصلاة. لو ما عملتش كدة، الصلاة هتختفي من حياتك. لو ما ممارستش الصلاة بميعاد، جرب تبتدي بربع ساعة تخصصها للصلاة. والأفضل تحدد ميعادك الصبح بدري قبل ما تبتدي يومك. لأنه بيساعدك أكتر من إنك تحدد ميعاد بالليل لأنك ممكن تبقى تعبان أو مشغول أو متشتت. الصلاة بتغير مسار يومك بطريقة كويسة.

قسم وقت صلاتك لأجزاء مختلفة. يمكن يساعدك إنك تكتب خطة الصلاة بتاعتك بحيث إنك تبص على حاجة لو صعب عليك تفكر في حاجة تصلي علشانها.

خد الاقتراح دا مثلاً: أولاً، اعترف بأي غلطات عملتها، واطلب المغفرة من الله. وبعدين قضي دقايق في شكره على صلاحه ومغفرته ورقته وحبه. خد دقايق أكتر في تسبيحه على أمانته وقوته. صلي لأجل أسرتك وأصدقائك. اهدا شوية، وانتظر الله يكلمك. وبعدين قضي أي وقت باقي في الصلاة لله علشان يديك قوة ليومك.

ممكن كمان تستخدم الكتاب المقدس كمرشد للصلاة. يعني مثلاً، اقرا الكتاب المقدس، وبعدين اتكلم مع الله عن اللي قريته، واطلب منه يساعدك تفهم الحاجة اللي حيرتك.

العادات الجيدة بتاخد وقت علشان تنمو. خليك صبور في العملية دي. وخليك صبور مع نفسك. لكن ما تكسلش.

وبعد ما ناس كتير بتجتهد إنها تقضي ربع ساعة في الصلاة كل يوم، بيلاقوا إنهم عايزين يطولوا وقت الصلاة. دا رائع! لقينا إن من المفيد تقسيم الوقت للتركيز على حاجات مختلفة. لأن دا بيمنع إننا نحس بالإرهاق أو بالإحباط.

الصلاة تصرف متعمد. زي الحب، لازم يكون مفعل علشان يكون حقيقي.

يمكن تتفاجئ لو التزمت بالتجربة دي إن الصلاة لمدة ساعة واحدة مش بس ممكنة، لكن كمان ممتعة! ودا لأننا محتاجين الصلاة. بنشتاق لعلاقة أقرب مع الله أكتر من أي حاجة تانية. والعلاقة الحميمة دي هي اللي بتغيرنا.

الله بيدعونا للصلاة. وبيشتاق إننا نتكلم معاه. الكلام مع الله بيشبع نفوسنا بطريقة مالهاش زي. لما بنهمل الصلاة، بنهمل نفسنا والناس اللي بنحبها. تعالى نقضي وقت مع الله، ونخليه يقوينا ويشجعنا كل يوم!

هو بيحب يشبعنا ويبسطنا بحضوره. وعايز يكون معاك، علشان تعرفه وتتمتع بيه.

حدد وقت مع ربنا في يومك، وإلا يومك هيزحم ومش هيكون ليه مكان فيه. لو أهملت الصلاة، هتلاقي نفسك محبط، ووحيد، وبتقع في الشر. لكن لو انت أمين في صلاتك باجتهاد، الله هيكافأك بأعمق من أي حاجة ممكن تتخيلها.

هل تعرف إن الله بيصلي لأجلك؟