الدرس 9

الصلاة هي الحديث مع الله.

عطا يسوع المسيح مثال بسيط عن الصلاة معروف بـ"الصلاة الرّبانيّة"، وبتلاقيا بإنجيل متّى 6: 9 إلى 13. وكانت هيدي الصلاة جواب يسوع المسيح لواحد من رفقاتو اللّي سألو كيف لازم يصلّي.

في أنواع مختلفة من الصلاة متل ما في أنواع مختلفة من الأحاديث مع الأصدقاء. فينا نصلّي كرمال شخص تاني أو نصلّي كرمال حالنا. وفينا نطلب من الله الحماية أو الشّفاء أو القوة أو الحكمة. وفينا نشكر الله على خيرو أو رحمتو أو مغفرتو. وفينا نخبّرو عن اللّي منحبّو، أو نشكرو على النِّعَم اللّي عطانا ياها، أو نخبّرو عن اهتماماتنا ومخاوفنا وشكوكنا وتساؤلاتنا.

كلّا أساليب منيحة للصلاة!

اللّي بيهمّ الله هو إنو تصلّي بصدق. هو بيعرف أفكارك. لهيك، صلّي من كل قلبك، وتواصل معو بتواضُع وامتنان وثقة.

رفاع إيديك خلال الصلاة، أو حطّن بحضنك، أو اجمعُن. فتاح عينيك أو غمّضُن. فيك تمشي أو توقف أو تقعد أو تنحني أو تتسطّح. فيك تصلّي الصّبح أو المسا أو بعد الضّهر أو طول اليوم.

ما تحاول تفرجي إنو كلامك عميق. الله ما بيتأثّر بالكلمات المعقّدة. هو بيعرف أكتر منّك. كون حقيقي وبس. كون نفسك وتحدّث مع الله باحترام. كون أكيد إنو بدّو يسمع صلاتك وأنو بيحبّ رفقتك عن جدّ.

صلّي لوحدك ومع ناس تانيين. كتير مهم إنو نصلّي مع بعض! الصلاة بتقرّبنا من بعضنا وبترضي الله.

ما تستحي قدّام الناس اللّي بيفرجوا ثقة أكبر وبيصلّو بصوت عالي. الصلاة تركيزها مش نحن. هدف الصّلاة هو إنو نتقرّب من الله لمّا منخبّرو عن اللّي بقلوبنا. وإذا حسّسك حدا بالخجل بسبب طريقتك بالصلاة، هيدا تصرّف بيدلّ على طَبعو المتعجرف، والتعجرف شرّ.

كلّ مسيحي لازم ينمّي عادة الصلاة الثابتة عندو. وهيدا بيعني إنو تحدّد موعد للصلاة كلّ يوم. إذا ما بتعمل هيك، رح تختفي الصلاة من حياتك. وإذا كنت ما بتصلّي بطريقة منتظمة بالأساس، فيك تبلّش بإنو تصلّي لمدة 15 دقيقة. ومننصحك بإنو تخصّص هيدا الوقت الصّبح بكّير قبل ما تبلّش نهارك. الصلاة الصباحية مفيدة عادةً أكتر من الصلاة عند المسا، لإنو يمكن تكون تعبان أو مشغول أو انتباهك مشتّت بفترة المسا. الصلاة قادرة إنو تغيّر مجرى نهارك بشكل إيجابي.

قسّم وقت الصلاة لأجزاء. يمكن يكون من المفيد إنو تكتب خطة صلاة لتكون مرجع إلك في حال لقيت صعوبة لتختار موضوع صلاتك.

رح نقترح عليك نظام للصلاة: أول شي، اعترف بأي أغلاط عملتا وطلوب السماح من الله. من بعدا، خود كم دقيقة لتشكرو على خيرو ومغفرتو ولطفو ومحبّتو. وخود كم دقيقة كمان لتمجّدو على وفاءو وقوّتو. بعدين، صلّي كرمال عيلتك ورفقاتك. خود كم دقيقة صمت وانطور إنو يحكي معك الله. أخيرًا، صلّي لالله ليعطيك القوّة لهيدا اليوم بالدقايق الباقية من وقت الصلاة.

فيك كمان تستعين بالكتاب المقدّس كدليل للصلاة. مثلًا، اقرا مقطع من الكتاب المقدّس، ومن بعدا تحدّث مع الله عن اللّي قريتو وطلوب منو يساعدك لتفهم الأجزاء الصعبة.

تنمية العادات المنيحة بتاخد شوية وقت. كون صبور بهيدي العملية. طوّل بالك على حالك، بس ما تكون كسلان.

بعد الالتزام بتخصيص 15 دقيقة للصلاة كل يوم، كتار بيحسّو إنو عبالن يطوّلو وقت الصلاة. وهيدا شي ممتاز! لاحظنا كمان إنو من المفيد إنو نقسّم الصلاة لمواضيع مختلفة منركّز عليا. وهيدا الشي بيساعدنا إنو ما نحسّ بالارتباك أو الإحباط.

الصلاة هي نشاط لازم نتقصّد إنو نمارسو. متل الحبّ، لازم تكون الصلاة عملية نشيطة لتكون حقيقية.

رح تتفاجأ بإنو إذا التزمت بالصلاة لساعة وحدة بس، بإنو هيدا الشي مش بس مُمكِن، هيدا الشي ممتع كمان! وهيدا لإنو نحن بحاجة للصلاة. نحن عايزين إنو نتقرّب من الله أكتر من أي شي تاني. وهيدي العلاقة القريبة مع الله بتغيّرنا.

الله بيدعينا للصلاة. هو بدّو يانا نحكي معو، وهيدا الحديث بيرضي روحنا أكتر من أي شي تاني. لهيك لمّا منهمل الصلاة، منكون عم نهمل حالنا والناس اللّي منحبّن. خلّونا نقضّي الوقت مع الله ونسمحلو يعطينا القوة والشجاعة كلّ يوم!

هو بيحبّ إنو يرضينا ويبسطنا بوجودو، وبدّو يكون معنا لنتعرّف عليه ونتنعّم فيه.

خصّص وقت لالله بيومك، وإلّا رح تطغى عليه إشيا تانية. إذا هملت الصلاة، رح تحسّ إنك محبط ووحيد ورح توقع بالشرّ. بس إذا كنت وفي والتزمت بالصلاة، رح يقدّملك الله مكافأة أكبر مما بتتخيّل.

بتعرف إنو الله كمان بيصلّي كرمالك؟