Lison 6

Si bu kumsa bu kaminhu ku Kristu, fia kuma i sta ku bo pabia ku tempu bu na disanima sedu.

Ora ku bu disanima, lembra kuma Deus i mas poderusu ki tudu kusa - inkluindu bu frakeza. Fia kuma i na muda bu vida i na fasiu nobu.

Ora ki no falha i no fika tentadu di fia kuma no ka tene speransa; no lembra kuma no kirsi ika pabia kuma no bon (no ka bon), ma pabia Kristu tarbadja dentru di nos atraves di no fiansa nel i atraves di no tentativas di ama, onra, i obedesil.

Kristu tene puder sufisienti pa protejinu di un mau disizon gosi? Klaru ki i tene! Tudu kusa bon na nos vida ta bin di el. Nos bon komportamentu ta bin di el, suma i ta tarbadja atraves di no fe, amor i sforsu.

I fiel pa afasta bo di mal? Sin duvida niñun!

Inton, pa ke ku ta manda no ta sinti asin tan inkapas? Ke ku manda i dixanu sinti fraku pa no dipindi del. Ka bu dixa bu frakeza nganau, ma sin,dixal sedu razon pa bu fia na Deus pa i sedu bu forsa.

Inton, keki ta tira no fiansa na Deus? Ora ki, di repenti, no pega duvida si no tene forsa di obedesi, ke ki muda?

No diskisi kin ki Deus. No diskisi ke ki anos nel. No fika ku duvida na no fiansa kuma el i tene puder pa vitanu di kudji mal. I, na bardadi, no dixa no korson bai lundju del pa otru kusas.

Kil ultimu eru i mas enganador i mas prejudicial. Tudu eru mau ta kumsa ku dixa no korson fuji di Kristu. Es ki manda i tan inportanti disenvolvi un abitu diligenti di lei Bíblia, ora i adora tudu dia. Pabia no ta diskuda fasilmenti i no mimoria i kurtu.

No ka pudi diskisi kuma Deus i no vida. Poema di Salbason fala, 'Muda ña vida i tornal nobu.' I ta mostra kuma no vida ka na sedu mesmu dipus ki no kunsi Kristu, i motivo i totalmenti pabia di kin ki el sedu.

Bu tene un amigu o algin di familia ki bu ama tchiu? Pabia di ke ki bu amal sin? I purki, abo i bon pekadur?

Un bias, algin punta un omi si i gosta di si mindjer pabia i era un bon algin. Kila fasi omi fika kunfundidu i un poku ofendidu. I gosta del pabia era maravilhoso! Si amor pa el ka ten nada a ver si i era bon algin o nau. Na bardadi, i sibiba kuma i ka era bon, ma i gostaba del pabia i amal nin ki si i ka tene bondadi.

No amor pa Jesus i suma kila. I ka sta ligadu ku no bondadi. No ta amal pabia el i maravilhosu. Tudu dia, no dibi pensa na si kualidadis maravilhosus toki amor ki no ta sinti parel ta intchi no osus.

Tris pratikas ki ta kultiva es i leitura di Biblia, orason, i adorason.

Bu duvida kuma es ta funciona?

Lei promesas di Deus di kuma ki i ka na largau nin abandonau. Kuma i na kaba bon tarbadju ki i kumsa na bo. Kuma i amau otcha bu odial ba el i kudjiu pa sedu si fidju. Kuma nada ka pudi siparau di si amor, so si bu ka fia nel o si bu fasi mal na discarna, kuma i purdau i setau.

Ora ki bu tene duvida kuma i sta na arnoba bu menti, lembra kuma i fasil atraves di si Palabra. Ora ku bu ten duvida kuma bu ka tene forsa pa nega mal, lembra di tempu ku i dauba forsa pa vensi mal na pasadu. Ora ku bu ten duvida kuma bu ka pudi amal, lembra kuma i muitu maravilhosu pa ka ama. Ora ku bu ten duvida kuma bu ka pudi fasi nada di bon, lembra kuma tudu kusa bon na bu vida ta bin di el.

Anda ku umildadi, amor, i obediênsia prátiku pa Kristu pabia bu ta fia kuma i na mudau i sempri i na fasiu nobu.

Spiritu di Deus ta mora dentru di nos, ku amor i ta mudanu di manera ki no ka ta nota. No ta partilha si vida suma un bebe ki ka padidu inda ta partilha sangi di si mame. Bebe ku mame i dus algin diferenti, ma se vida ta mistura na un manera bonitu. Di mesmu manera, Spiritu Santu ta da vida pa no spiritu atraves di sangi di Jesus.

Si Spiritu i kil ku no ta sinti dentru di nos ora ku no na ora i adoral. Sintimentu di kuma si Spiritu na vivi dentru di nos kila i un speriensa vital di tudu dia. Sin un sintimentu konstanti di kuma si Spiritu na vivi dentu di nos, no na fraku. Ma ku el, si Spiritu ta fasinu forti suma nada mas ka pudi fasi.