Ngigsa 9

Giaʼgle, yi lée na Nzambi.

Yesus mi nle vi ndtimbi na “magiaʼgle ma Ntsi” Matias 6. 9-13. Magiaʼgle rimo mi mbe mbpiangsa ñe mi nle bosuo bó, lin bo mi ndzii ñe mbpiñie bo ywua na giaʼgle.

Di, magiaʼgle ma bvu makaʼg, koo mbpi yaʼg minlong paʼgla bosuo mi bvu makaʼg. Vi yi nambvul giaʼgle puʼg ma bur bofii. Vi yi nambvul giaʼgle puʼg ma vilebopfuo. Vi yi nambvul giaʼgle pe naa bio yaʼg dig vi pan, pe naa vi baʼg mbpambpa, pe naa vi baʼg na mbvul hea na piʼg. Vi yi nambvul le Nzambi awa puʼg ma mbpam nwó, puʼg ma ngkuong a gyug vi, na pe naa a kiera vi. Vi yi nambvul lée ñe sá vi kyual.

Mam maywema momea ma yi kundaʼg mapuʼg magiaʼgle!

Nzambi wum naa o giaʼgla pueʼgpueʼg ritu. A limbo mabuangsa mo. Giaʼgla na nlima nwo nwuywua. Sia bebee na ñe na sil ñul si, na limbo mbpa a sá ywe, na kie mabvoʼg bo ñe,

giaʼgla na bindele mabuo bvuo, na kal mo mabuong mo ri, na baʼg mo. O yi nambvul giaʼgle mii nabele ka naa mii ndzioa. O nziéʼg ke bikien ka naa o tel, o mbue pfur mabuong ka naa o buʼg si. Giaʼgla manaywua ka naa kuguywua, ka malanga ma tuelfu, ka yaʼg naa ndzima nte duo.

Ywaʼg dig wum sá mam ma nen. Nzambi aʼg bisi le buraʼg bibang. Kiong nwó yi bvuo bal nwo. Baʼg sá pueʼgpueʼg, lea na Nzambi na simuʼg. Limba pil ñenywua naa a wum gyueʼg magiaʼgle mo, nagi a kyual ywe, hea a wum dzi bo ywe.

Giaʼgla ywelepfuo hea giaʼgla na bur banʼga. Giaʼgle luanga yi na puaʼg mala! Ye sá naa vi gyugla mañana, ye susgu Nzambi.

Ywaʼg dig gir naa bur bo saʼg naa o pfunda, bur bo súse giaʼgle bvuo ritu bal ywe. Magiaʼgle maʼg be le na sa ndzinii dig vi. Magiaʼgle ma yi pe siele vi bebee na Nzambi, nagi vi miag ñe minlima mimvii. Ka mur sá naa o gyuga suen pe giaʼgle, ye balee liole kaʼg mur a yí, kaʼgle kaʼg mur o yí. Ye liole naa a buaʼg nlima, buaʼg nlima yog yaʼg be le mbpa.

Krison ñenywua ywua na giana naa a giaʼgle duo mbpi duo, yiguʼg vur. Ndzina wum lée naa o bir ndzima pil o giaʼgle pe duo. Ka ywaʼg sá le ndzina, o ki faʼgla kile ná giaʼgle tsiʼg ye ri. Ka ywaʼg pónglé dungee ndzima bopil pe giaʼgle, pong taare kieʼg tsieʼg naa o ki giaʼgle giaʼgle minut wum na mintan. Ye kuel kuel bvubvu nagi ka o buangsa naa kuguywua wo o ki giaʼgle, o yi nambvul be na mam bvubvu pe sá, ka bil na tiaʼg, ka yaʼg naa o wusa ri. Magiaʼgle ma yi nambvul zir duo naa ye baʼg kaʼg fii puʼg ye.

Koa pil nwo magiaʼgle mangkoo maba. Kien ndzinii e yi mbpa naa o tsila mam o nzí dungee puʼg magiaʼgle. E yi pe naa o baʼg nambvul buangsa mam o ywua na kie magiaʼgle ri.

O yi nambvul sá mbpi: Taara na lée Nzambi mimbiu mie, na dzii ñe naa a kiera ywe. Tsina o le ñe awa puʼg ma mbpam a sá ywe, wuwel a le ywe, na kyual yé. Bvumla ñe puʼg ma mbpam nwó na ngkangkal yé. Giaʼgla puʼg ma ndtoo bur nwo hea na puʼg bosuo bo. Soanga dzi nawoo, o zangla naa Nzambi léa ywe sá dzinii. Pil nzig ma ywe, nunga ñe pe dzii Nzambi naa a ñimla ywe, hea a kumsa duo ye.

O yi yaʼg nambvul biala na Bibel pe liole ywe mbpiñie o ywua na giaʼgle. O yi nambvul láng Bibel, tsina o lée nzambi mam ywaʼg luang láng. Dzia ñe naa a numa ywe panʼgu binuma ywaʼg pongle numa gyueʼg.

Pe limbo sá mam, ye nung pil. Kanda sa sueʼg na sá́ mbpi o ywua na sa, limba dzisoo ywelepfuo. Ywaʼg dig gir naa lesi saʼg naa o baʼg kile sá mbpi o ywua na sá.

Bur bvubvu bo yi naa, lin a mua nambvul giaʼgle minut wum na mintan duo mbpi duo, aʼg wum kuala pil nwó magiaʼgle. E yi ñenge lab! Me mi nñina naa e yi mbpa naa me koa pil nwang magiaʼgle mangkoo maba. Ye sá naa nlima baʼg me nawoo, maʼg dig gyuaʼgra ye dzile me.

Magiaʼgle ma ywua na vu nwuma nwo ri. E yi mbpi kyual, ye ywua na ñinʼga pe be pueʼgpueʼg.

Ka ywe balee kyual biala na nkolo, o ki ñina naa giaʼgle tang ndzima wula nkolo yi bvugbvu, e yi yaʼg biala ñenge lab! E yi puʼg naa vi ywua na giaʼgle. Vi gyueʼg yie be na kundaʼg nlar na Nzambi, bal minlar mimfii vi bir. Hea, nlar rinwo tsendi vi.

Nzambi wum naa vi giaʼgla. A wum naa vi lea na ñe. Lée na Nzambi le vi dzílé sindi ri bal mam momea. Lin vi be kile giaʼgle, vi wusa vilebopfuo, hea na wusa bur vi kyual. I nlangla ngka pil magiaʼgle ri. I ngira ngka Nzambi ñimla vi, na le vi mbvul nlima ri duo mbpi duo!

Nzambi kyual naa vi baʼg na dzílé, a kyual vi sá mbpa. A wum yimbo na ywe, pe naa ywe baʼg nambvul limbo ñe hea o susa na ñe na be luanga na ywe.

Ka ywaʼg dungee le ndzima pil o ywua na be na Nzambi pe duo, ywaʼg kaʼgle ná be na pil puʼg yé. Ka o bir lesi magiaʼgle, nlima ki ywe bil na tiaʼg, o ki gyuaʼgra naa o yi ywelepfuo, tsina o taare na sá bio. Di ka o yi ki magyuerara, tsina o giaʼgle bopil o nzí tel ri, Nzambi ki ywe le kaʼg miana ywaʼg pongle buangsa.

O limbo mere naa Nzambi giaʼgle puʼg ye?