Ngigsa 6

Ka ywe ntaaare ma kien ye na Krist, o ywua na be mabvoʼg na ñe, ywaʼg ké kuiga bil na tiaʼg.

Ka ywe ñ̃̃ina naa ywe mbil ma na tiaʼg, limba naa Nzambi yi na mbvul bal sá yiyia, a yi na mbvul bal tiaʼg yí ywe ñul ri. Bvaʼgla naa a yi nambvul tsendi tsiʼg ye na le ywe tsiʼg wanaa.

Lin vi kyu mpamli, vi yi nambvul taare na buangsa naa viaʼg be le ná na mala mandzinii; vi ywua na buangsa naa ka vi lunga, yaʼg be le napuʼg naa vi yi mbpa (yaʼg be le ndzina). Di vi lunga napuʼg naa Krist gianda bo vi nandtang mabvoʼg vi bir bo ñe, hea na mbvul vi sá pe kyual ñe, pe bvumle ñe, na pe sá ñe magyueʼg.

Krist yi mere na mbvul pe sá naa viaʼg dig be na mabuangsa mabio dziiri? Yang! Kundaʼg sá yiyia yí bitsiʼg bivii ri vu bo ñe. Kundaʼg bigiama vi bír bie vu bo ñe, nagi a gianda nandtang mbváʼglá vi bvaʼgla ñe, kyual vi kyual ñe, na mbvul vi sá.

A yi tsiriri pe taare vi bio ri? Yang!

Puʼg gi ri vi kee balee ñina naa viaʼg be le nambvul sá tosa? E yi napuʼg naa ñelepfuo wo miaʼgle naa vi ñína naa viaʼg be le na mbvul ndzinii, ndtang mabvoʼg mavii ma baʼg bo ñe. Ywaʼg dig gir naa tiaʼg o bir gyuera ywe. Biala na tiaʼg riye pe naa ywe ñina mala ma kie mabvoʼg mo bo Nzambi, nagi ñe wo yí nambvul le ywe mbvul.

Gi kambo naa vi kia mabvoʼg mavii bo Nzambi? Lin vi sá masuna, saga viaʼg ñina naa viaʼg be le nambvul sá ñe magyueʼg, gi nzí tsendi?

Vi nwusa nze yi Nzambi. Vi nwusa naa vi yi bo ñe. Vi nwusa mabvoʼg vi mbaga na mo naa ñe bir mbvul pe sá naa viaʼg dig pee nzi bio. Tsina ri vi gir minlima mimvii vu bo ñe pe ke wanga na mam mafii.

Mbvinda mafaʼgla vi sá, wo balee be masuo ri na ñamgu mam bvubvu. Bio mbpi bio vi sá yi napuʼg naa vi ntaare gir minlima mimvii ke gigia na Krist. Sariye e yí mbpa naa o lánga Bibel, o bvumla Nzambi pil mbpi pil, duo mbpi duo. Napuʼg naa vi kuiga wusa sá vi ywua na sá, vi kuiga wusa mam.

Viaʼg be le nambvul wusa naa Nzambi yi tsiʼg vii. Ñenge Ndtande ma Nkurga tande ye mbpi: "Tsenda tsiʼg yang, tsenda nlima nwang''. A limbo naa tsiʼg vii yaʼg be le ná nambvul be yiguʼg vur, lin vi nlimbo ma Krist. E yi mandzima mandzima napuʼg nze Krist yí.

O bir mere mur luanga bosúo bo ka ndtoo bur ri o balee kyual? Puʼg gi o kyual ñe? Na naa e kee be napuʼg naa o yi kundaʼg mur?

Ka mur dzii me ka me kyual mura nwang napuʼg naa me yi kundaʼg mur, me ki kam lab riye, me yi mere yaʼg nambvul dziga. Me kyual ñe napuʼg naa a yi ñenge lab! Maʼg kyual le ñe na me na be kundaʼg mur. Me limbo naa maʼg be le mbpa. Me kyual ná ñe napuʼg naa giama be ndzina, a kyual me.

Kyual vi kyual Yesus yi yaʼg ndzina. Yaʼg be le napuʼg naa vi yi kundaʼg bobur. Vi kyual ñe napuʼg naa a yi ñenge lab. Duo mbpi duo, vi ywua na buangsa biñenge bimam a yí, nakepan lin vi ñina naa vi nlundele ma na kyual puʼg yé.

Pe naa ye séega, ye bir manzi malal: láng Bibel, giaʼgle, na bvumle Nzambi.

O buangsa naa yaʼg kuel le tosa?

Lánga ngkagu ma Nzambi, ñi ki naa aʼg kaʼgle ywe gir naduo, aʼg kaʼgle ywe wusa naduo. Naa a ki sil kundaʼg sál a nzí taare bo ywe. Naa a nkyual ywe lin ywog nzi ñe zinde zinde, naa a mpee ywe pe naa o báʼg mur nwó. Naa tosa yaʼg be le na mbvul koo ywe na kyual yé, yenge yenge naa ywelepfuo tio ñe gigia, na sá bio. Hea lánga ngkagu nwó ki naa a nkiere ywe, a mmiaʼgle ywe.

Ka ywaʼg bvaʼgla le naa a yi nambvul le ywe sindi wanaa, buangsa naa a sá ye nandtang bang yé. Lin o buangsa naa ywaʼg be le nambvul gir bio, buangsa bikien bibia ñe mi ntaare ywe le mbvul gir bio. Lin o buangsa naa ywaʼg be le nambvul kyual ñe, buangsa naa a balee be kaʼg ñenge lab o ywua na kyual. Lin o buangsa naa ywaʼg be le nambvul sá lab mbpee ndzinii, buangsa naa lab mbpee yiyia o bir vu bo ñe.

Baʼg na nsila ñul si, na kyual, na magyueʼg ma ñinʼga krist ritu, o nziéʼg bvaʼgla naa a tsendi ywe, na zir ywe wanawana pil mbpi pil.

Sindi ma nzambi dzi vi mañul ri, na kyual vi, na tsendi vi kaʼg viaʼg kiamsa le buangsa bopil bondzinii. Vi buama tsiʼg bo ñe, koo mbpi mua yí ná muo ma ñiung ri buama tsiʼg yé bo ñiung. Mua benoo ñiung bo yi bur boba, nkoala, di bitsiʼg bio bi yi nsangsa, kaʼg kikiang nsea. Mbpiywue yaʼg Sindi Ntanea le bisindi bivii tsiʼg nandtang matsie ma Yesus.

Sindi yé wo vi gyuaʼgra lin vi giaʼgle na bvumle ñe. Gyuaʼgra Sindi yé, gi tsíʼg bo vi, yi sá vi ñina bitsiʼg bivii ri duo mbpi duo. Ka viaʼg gyuaʼgra le Sindi yé pil mbpi pil, tiaʼg bi vi. Di lin vi yí nlundala na Sindi yé, vi yi nambvul, vi yi nambvul vumla na sá yiyia.