الدرس 3

من أهمّ الإشيا لإيماننا إنو نعرف إنو يسوع المسيح قام من الموت وهو حيّ للأبد. فلو كان يسوع المسيح بعدو ميّت، ما كنا منقدر نختبر حياتو. بس روحو القدوس اللّي عايش فينا هو من أعظم الهدايا اللّي بيعطينا ياها.

من الأسباب اللّي بتخلّينا نعيش الحياة مع الله هي موت يسوع المسيح اللّي خلّانا نصير طاهرين بعين الله، بس هيدي الحياة صارت حقيقية لمّا قام من الموت وصار حيّ للأبد بالجنّة وفينا. وهيك انوعدنا بالحياة الأبدية بعد الموت، لإنو رح نتحرّر من هيدي الحياة المكسورة ونتنعّم بحياتو الأبدية بس.

يسوع المسيح هو الإله الحقيقي، والإنسان الحقيقي. انخلقو آدم وحوّا، وهنّ أوّل رجّال وأوّل مرا ليعيشو للأبد، بس قراراتن الشريرة قتلتن. والشرّ هو اللّي رح يقتلنا نحن كمان. الشرّ هوّ سبب موتنا كلّنا، بس يسوع المسيح بيعيش للأبد لإنو ما ارتكب أي أعمال شريرة أبدًا. وهيدا دليل على إنو يسوع المسيح هو الله، لإنو الله وحدو كامل.

مع إنو يسوع المسيح مات، ما قتلو الشرّ. قدّم حياتو بملء إرادتو، وما قدر الموت إنو يتمسّك فيه لإنو ما خطي أبدًا. طهارتو عطيتو الحقّ بإنو يسترجع حياتو.

وهيدا اللّي عملو يسوع المسيح.

رجع للحياة وهيك برهن عن قوّتو وألوهيّتو وإنسانيتو المثالية وقدرتو على إنو يعطينا الحياة ويقوّمنا من الموت. بس كمان رجع للحياة لنعيش نحن كأصدقاء إلو للأبد.

خلّينا نتأمّل بهيدي الفكرة شوي.

ما رح نكون لوحدنا أبدًا لإنو هوّ حيّ فينا. وفينا نوصلّو بكلّ لحظة من كلّ يوم. وفينا نصلّيلو ونحسّ بعواطفو عم تتحرّك بقلوبنا. هو بيعرف أفكارنا وبيحبّنا، وبيعطينا القوّة لنعيش طاهرين. وفينا نعيش بمحبّتو وفرحو وسلامو وصبرو ولطفو وخيرو وإيمانو ورقّتو وضبطو للنفس. هو بيقدّملنا الحياة الكاملة لمّا منلاقي حياتنا فيه.

بيقول الكتاب المقدّس إنّو سبب وجودنا هو لنعيش حدّ يسوع المسيح، وإنو نعيش قراب منّو هو أكتر من أي شخص تاني على الكرة الأرضية، وإنو نحبّو أكتر من أي شي أو أي شخص تاني، وإنو نسمع كلمتو ونعبدو للأبد بكلّ فرح.

لإنو نحن موجودين على هالأرض لنحبّ يسوع المسيح ونعيش معو، بيسمّي الكتاب المقدّس المسيحيين "عروس المسيح". وبيقول الكتاب المقدّس كمان إنّو كلّ حدا بينكر يسوع المسيح هو مُدان. وجهتنا هي حضن يسوع المسيح. وما بيقدر أي شخص بيكره يسوع إنو يصير بحضنو، بل رح ينفصل عنو للأبد.

هيدا مصير مُرعب ما بيقدر يتخيّلو إلا ناس قلال. كتار ما بيعرفو إنو أي حياة أو فرح منعيشن هنّ من الله. نحن منتنعّم بحياتنا باللّذّات البسيطة لإنو الله قدّملنا ياها. ولمّا نموت، رح ننحرم من كلّ هيدي اللّذّات. ويا منبقى مع يسوع المسيح ومنتنعّم بالفرح الأبدي، يا منشوف الرُّعب والأسى بعيد عنو.

بلّشنا نشوف إنو حضن يسوع المسيح هو أعظم وجهة بالكون. وإنّو أعظم لذّة بالحياة هي إنو نختبر السلام والحياة معو. وأي شخص عاش عن جدّ بالقرب من يسوع المسيح رح يبرهنلك إنو يسوع المسيح أحلى شي بالدّني.

بالبداية، يمكن نخاف كتير إنو نسمح ليسوع المسيح يفوت على روحنا لإنو بيكشف عن الشرّ اللّي جوّاتنا وبيدفشنا لنسلّم حالنا. بس لمّا منسلّمو حالنا، بيقدّملنا الشّفاء الحلو وبيعطينا القوة لنتحمّل وننما.

لمّا بتتبع يسوع المسيح وبتسلّمو نفسك، رح يصير أعظم لذّة ويغيّر حياتك ويطهّرك.

وبعدا، بعد موتك، رح تكون بجنّة حضنو.