Lison 10

Igreja i tudu kin ki Deus salva. Anos i igreja.

Si no fala, 'No ka misti igreja,' na bardadi no sta na fala, 'No ka misti otrus Kristons, i no ka misti sedu Kristons anos propi.'

Anos i familia di Deus. Fasi parti di es familia ta djudanu vivi vida Kriston. No pircisa di n'utru pabia sin utrus, familia ka ten. Sin djuda n'utru ku amor, no na kai. Deus fasinu pa vivi ku El djuntu. Si no ka vivi na comunidadi ku utrus, no ka sta na vivi nada.

Suma karbon ki na sindi si i tiradu di fugon, si no sta anos son, no fogu na bai paga. Ma si no sta djuntu ku utrus Kristons ku korson kina kema ku paixon, no fugu na bai fika mas klaru.

Biblia tambi falanu pa ka no dixa di sinta djuntu. Si bu ka ta djunta regularmenti ku otrus kriston pa lei Biblia, ora i anima kunpanheru pa vivi vida kriston, bo na kaba pa kai lunju di Deus. Sinta ku otrus kriston di es manera ta djudanu kirsi; i tambi ta animanu i ta motivanu. I ta tiranu di no natureza egoista.

No ka ta djunta ku kunpanheru so pabia no ten ki djunta. No ta djunta ku kunpanheru pabia i un presenti pa no sta djuntu. Kila ka signifika kuma no ten ki djunta na kasa di no kunpanheru kristons, mesmu si kila i bunitu i importanti. No pircisa mas di ki kila.

Kiki no pircisa del, ezatamenti?

No pirsisa di amigus ki amanu, responsabilidadi pesual, insinamentu forti, autoridadi di Bíblia, ku oportunidadis pa guia otrus pa sta mas pertu di Kristu.

No pirsisa vivi bas di autoridade di pastores ku ansions ki dadu ses posison dipus ke prova se fidelidade na se manera di vivi ku kirsimentu na kunhisimentu di Deus ku si Palavra. Si no ka sta bas di autoridade di profesoris kualifikadus ki ta vivi keki eta prega, no krensa sobri Deus pudi muda pa un kusa ki Deus nunka misti.

Maioria di djintis ka gosta di utrus djintis bata kontrola se manera di vivi. I ka sabi pa no vida sedu izaminadu i pa no sedu faladu kuma no sta na iara, no pirsisa di muda. Ma si ika ten algin pa kontrolanu, no erus na djunta toki padjiga i fasi mal pa djintis.

Pa fasi parti di un igreja, ku prufessoris kualifikadu suma kilis ki sta na Bíblia, ta fasi no manti no kabesa responsável.

Autoridade di profesoris kualifikadus tambi ta protejinu di djintis ki misti abusa n'utrus. I ta fasi no tene djintis ki no pudi bai pidi ajuda si no sufri maltrato. Manga di bias no ta misti algin pa apoianu.

Finalmenti, i ta danu un strutura pa komunidadi nunde ki no pudi otcha un manera di djuda leba n'utrus mas pertu di Kristu. No ka pudi diskisi kuma dipus ki Deus muda no vida, i falanu pa no sina n'trus tambi sobri El.

I facil evanjelisa na un ambienti ki ka struturadu, mas formason di disiplus kila i un kumprumiso di muito tempu. No dibidi sempri forma disiplus enkuantu no na submiti no kabesa bas di autoridadi di pastoris i ansions ki pudi tudjinu no konduzi djintis di maneira eradu o magua djintis ku no sta na tenta djuda

Kuma ki bu pudi enkontra un komunidadi di fé? Primeru, pidi Deus pa djudau. Dipus purgunta na roda di bo. Rapada djintis ki ta vivi vida puru ku amor, diskubri kal ki igreja ke ta bai. Kumsa ta vizita igrejas. Buska un igreja nunde ki djintis ta risibi ben, e natural, e tene amor. kontra ku pastores ku ancions ki kerdita na keki Bíblia ta ensina klaramenti, e ka ta duvida ke ki Bíblia fala. E sibi tambi si elis e ta vivi ke ki e ta fala kuma e kerdita. Si nau, e ka kerdita di bardadi.

Kualker igreja ki bu bin kudji frekuenta, sera ki, la, djintis gosta di n’utru i e ta djuda n’utru? Sera ki e gosta di Biblia i e ta djuda n’utru na kuma ki e ta vivi se fe di manera pratika i real ki pudi sedu odjadu? Ningin ka pudi sta perfeitu! Mas bo pudi fasi diferensa entri djintis ki kata prekupa si se vida sta rumadu ku djintis o nau ku kilis kita ripindi di se erus.

Punta bu kabesa es purgunta li: sera ki Deus sta onradu i adoradu la?

I ka ten komunidadi di igreja pirfitu, mesmu manera ki ka ten pekadur pirfitu. Kudji so un igreja ki sta bon, ba ta bai lá sempri, i ka bu keicha. Sedu mudansa ki bu misti odja. Buska oportunidadis pa inkoraja bu familia na Kristu. Ama djintis ku sinseridadi! Sirbi ku amor ku korson limpu. Ka bu tenta sedu konsideradu 'bon' pa utrus djintis.

Recoñesi kuma anos i ser umanu, i no pirsisa di n'utru. I kata sibidu, kil pekadur ki bu ka gosta di el pudi sedu algin ki Deus pui na bu kaminhu pa djudau kirsi. I pudi sedu bu pudu na si kaminhu pa djudal kirsi na Kristu ku mansidon. Vivi ku pas, i onra Deus djuntu. Kila ki igreja.