الدرس 10

الكنيسة هي أي حد خلصه يسوع. إحنا الكنيسة.

لو قلنا "إحنا مش محتاجين كنيسة"، فإحنا بيبقى قصدنا "مش محتاجين أي مسيحيين آخرين، ومش محتاجين نكون إحنا نفسنا مسيحيين."

إحنا عائلة الله. كوننا جزء من العائلة دي بيساعدنا نعيش الحياة المسيحية. إحنا محتاجين بعض علشان بدون بعض، مفيش عائلة. بدون ما ندعم بعض في محبة، هنبعد عن بعض. الله عملنا علشان نعيش معاه مع بعض. لو مش عايشين في جماعة مع الآخرين، مش هنعيش على الإطلاق.

زي الفحمة اللي بعدت عن النار، لو إحنا لوحدنا، النار بتاعتنا هتطفي. لكن لو إحنا حوالين مسيحيين آخرين قلوبهم حارة، شعلتنا هتنور أكتر.

الكتاب المقدس برضو بيقول لنا ما نهملش اجتماعنا. لو مش بتجتمع بانتظام مع المؤمنين الآخرين لقراءة الكتاب المقدس والصلاة وتشجيع بعض على الحياة المسيحية، هتبعد عن الله في النهاية. وجودنا مع المسيحيين الآخرين بالطريقة دي بيساعدنا ننمو، وكمان بيشجعنا ويحفزنا. بيشدنا بعيد عن طبيعتنا الأنانية.

مش بس بنجتمع مع بعض علشان لازم. لكن بنجتمع مع بعض علشان دي عطية إننا نكون مع بعض. دا مش معناه إننا لازم نتقابل في بيوت أصدقائنا المسيحيين، حتى لو دي حاجة جميلة ومهمة. لكن بنحتاج أكتر من كدة.

يعني إيه اللي محتاجينه بالضبط؟

محتاجين أصدقاء محبين، ومُساءلة شخصية، وتعليم راسخ، وسلطة كتابية، وفرص لقيادة الآخرين علشان يقربوا من المسيح.

محتاجين نعيش تحت سلطة رعاة وشيوخ بقوا في مناصبهم بعد ما أثبتوا أمانتهم في أسلوب حياتهم ونموهم الحقيقي في معرفة الله وكلمته. لو إحنا مش تحت سلطة معلمين مؤهلين عايشين اللي بيكرزوا بيه، معتقداتنا عن الله ممكن تتغير لحاجة الله ما قصدهاش أبدًا.

معظم الناس مش بيحبوا إن ناس تانية تخليهم محل مُساءلة علشان يعيشوا بطريقة معينة. مش مريح إن تكون حياتنا محل فحص ويتقال لنا إننا بنلخبط ومحتاجين نتغير. لكن لو ما اتحطيناش في محل مُساءلة، غلطاتنا هتتراكم لغاية ما تنفجر وتؤذي الناس.

وجودنا كجزء من كنيسة، تحت معلمين مؤهلين بيعملوا زي ما بيقول الكتاب المقدس، بيحافظ علينا علشان نبقى قد المساءلة.

سلطة المعلمين المؤهلين كمان بتحمينا من الناس اللي عايزين يسيئوا للآخرين. بتخلي يبقى عندنا ناس نلجأ لمساعدتهم لما حد يسيء معاملتنا. كتير بنحتاج ناس عشان يبقوا في ظهرنا.

أخيرًا، بتدينا جماعة منظمة نقدر فيها نلاقي طريقة نساعد الناس الآخرين علشان يقربوا من المسيح. ما نقدرش ننسى إن بعد ما الله بيغير حياتنا، بيقول لنا نروح نعلم الآخرين كمان عنه.

سهل إننا نكرز في ظروف غير منظمة، لكن تلمذة الناس دي التزام طويل المدى. لازم نبقى دايمًا بنتملذ الناس وإحنا نفسنا خاضعين لسلطة الرعاة والشيوخ اللي يقدروا يحافظوا علينا من قيادة الناس غلط، أو من جرح الناس اللي بنحاول نساعدهم.

إزاي تلاقي جماعة مؤمنين؟ أولاً، أطلب من الله يساعدك. وبعدين اسأل الناس. لاحظ الناس اللي عايشين حياة نقاوة ومحبة، ودور على الكنيسة اللي بيروحوها. ابتدي بزيارة الكنايس. ودور على كنيسة يكون الناس فيها مرحبين وعلى طبيعتهم ومحبين. دور على رعاة وشيوخ مؤمنين بتعليم الكتاب المقدس صراحة ومش بيشكوا في اللي بيقوله الكتاب المقدس. تأكد من إنهم كمان عايشين اللي بيقولوا إنهم مؤمنين بيه. وإلا يبقوا مش مؤمنين بيه فعلاً.

أيًا كانت الكنيسة اللي هتروحها، هل الناس بيحبوا ويخدموا بعض؟ هل بيحبوا الكتاب المقدس وبيساعدوا بعض يعيشوا إيمانهم بطرق عملية حقيقية انت تقدر تحس بيها وتشوفها؟ محدش كامل! لكن انت تقدر تعرف الفرق بين الناس اللي مش مهتمين إذا كانت حياتهم متوافقة مع التعليم المسيحي، والناس اللي بيندموا على غلطاتهم.

اسأل نفسك السؤال دا: هل الله فعلاً معبود ومكرم في المكان دا؟

مفيش جماعة كنسية كاملة، زي ما مفيش حد كامل. لكن دور على كنيسة بسيطة وواظب عليها وما تشتكيش. كون انت التغيير اللي نفسك تشوفه. دور على فرص لتشجيع أسرتك في المسيح. حب الناس بصدق! اخدم بقلب محب ونقي. مش كمحاولة إن الناس تشوفك "كويس".

اعرف إننا بشر، وإننا محتاجين بعض. عمرك ما هتعرف إن ممكن الشخص اللي بيضايقك يكون شخص ربنا حطه في حياتك علشان يساعدك تنمو. وممكن تكون انت كمان اتحطيت في حياته علشان تساعده بوداعة إنه ينمو في المسيح. عيشوا بسلام واكرموا الله مع بعض. هي دي الكنيسة.