Ngigsa 10

Kios, yi mur mbpi mur Nzambi nzí kur. Kios yi me, a yi ywe.

Ka vi ki naa “viaʼg wum le kios”, e yi mbpi sá ki naa vi lée naa “viaʼg wum le bokrison banʼga, hea naa vilebopfuo viaʼg wum le be bokrison”.

Vi yi ndtoo bur ma Nzambi. Ye bo sá naa vi baʼg nambvul tsiʼg tsiʼg ma Krison. Mur yi mbvul na bur banʼga, nagi bur banʼga nzul, ndtoo bur kile be. Ka viaʼg leala le mbvul, vi ki kyu. Nzambi mi nte vi naa vi tsiga luanga na ñe. Ka viaʼg tsiʼg le luanga na bur banʼga, vi kile be nambvul tsiʼg.

Koo mbpi mbvulsieʼg bo nzí vul sieʼg ri, ka vi yi vilebopfuo, vi ki sil dzima. Di ka vi yi na bokrison banʼga minlima mi yí nlunda na sieʼg, sieʼg vii ki leg koo sueʼg na sueʼg.

Bibel ki yaʼg naa viaʼg dig wusa bisuala na bokrison banʼga. Ka viaʼg suala le pil mbpi pil na bokrison banʼga pe láng Bibel, pe giaʼgle, na pe leala mbvul minlima ri pe tsiʼg tsiʼg bokrison; vi ki sil ke gigia na Nzambi. Be na bokrison banʼga kuel vi naa vi lúnga. Ye le vi mbvul na le vi masusi.

Yaʼg be le naa vi suala koo napuʼg naa vi ywua na suala. Vi ywua na suala napuʼg e yi len mi nseo vi. Yaʼg be le lab ma ke suala bo mur ñina ka naa bo mur ñinii; ye dzima bal ywa.

Gi ri vi ywua mere na sá?

Vi ywua na be na bosuo bo kyual bur, na ndzima sá vi ywua na sá bo, na ngigsa ñimle vi, limbo Bibel, na nzi na bur banʼga Krist ri.

Vi ywua na be maku bopasteur na botumba bo kios risi, bo bo nzí buama dzi yoo nandtang bo nzí liole tsiriri nwoo bidziala bio ri, bo bo lunga Krist ri hea na bang ma Nzambi ri. Ka viaʼg be le maku ma boliole bo tsiʼg leble mingigsa mio ri si, mam vi bvaʼgla bo Nzambi maʼg kaʼgle ná be mbpi a dzii naa ma baʼg.

Viaʼg kyual le miaʼgle miaʼgle bio vii sueʼg ma mur. Viaʼg kyual le ñina naa mur tue bitsiʼg bivii, tsina a lée naa vi ndzim sá, naa vi ywua na tsendi. Di ka viaʼg miaʼgle le bio sueʼg ma mur, bio vi sá ki be koo kaloo ginʼga bvuo. Tsina bio riye ki faʼgla na be bvubvu, na beele bur banʼga mapiung.

Lin vi yi ndzima kios ri, maku ma kundaʼg boliole bo yí mbpi Bibel dzii ri, vi gir vilepfuo naa vi baʼg nambvul mama bio vii sueʼg nwoo.

Be maku ma kundaʼg boliole ribo ri kamla na vi sueʼg ma bur bo gia sá koo buama nsengi nwoo bo bur banʼga. Ye le vi bur vi yi nambvul ke bo bo ka mur ntible vi. Nagi pil ndzinii, ye dzii naa bur banʼga bo foʼgla vi.

Faʼgla faʼgla, ye sá naa vi baʼg ndzima luanga bur bo wum nzi na bur banʼga bo Krist. Viaʼg dig wusa naa lin Nzambi ntsendi ma bitsiʼg bivii, a ki naa vi gigsa bur banʼga, na sá naa bur bo limba ñe.

E yi bvugbvu pe bum kundaʼg puo numa mintela mi mam miaʼg pónglé lii bvu. Di sa naa bur bo baʼg bogig, ye nung pil. Lin vi sa naa bur bo baʼg bogig, vi ywua na gia gia naa vi baʼg maku bopasteur risi, ka naa maku botumba bokios risi.

Mbpiñie o yi nambvul kue luanga bur bo bvaʼgla? Gi mataara, dzia Nzambi naa a kuela ywe. Vu ywa, kanda ke kaʼg dzii bur bo yí ywe mangkiamba. Gia bur bo tsiʼg tsiʼg yí wung, ye bieʼg nlunda na kyual. Gia numa kios nwoo yí. Kanda ke kaʼg dig puaʼg bokios ri. Dziʼg kios o ki kue bur bo bieʼg na mavuga ri, bo kile be na magyuerara, bur bo kyúal bur. Dziʼg numa bopasteur na botumba bo kios bo bvaʼgla sá Bibel lée mandzima mandzima, kile sundele tosa tsina. Di ka bo sundele, limbo naa baʼg numa le ñe bvaʼgla.

Vi pong dig naa vivia vi yi bur bo si ñina, naa mur aʼg be le mbvul na ñelepfuo. Mur aʼg limbo le. Pil ndzinii, mur balee ywe dzigsi, ñe bo yí mur Nzambi nzí tel sueʼg nwo pe naa o lunga. Kien dzinii ywog yi yaʼg tsiʼg yé ri pe naa ye lunga Krist ritu. Tsiga ngka wuwel ri, hea bibia laʼg ngka Nzambi simuʼg yé. Sá bo gio kios, ye béé.

Dzia ywelepfuo tsia ñina: O kios riñe ri, bo le mere Nzambi simuʼg? Bo bvumle mere ñe?

Kios mbpi kios bir mié mimbvinda. Gia sá koo kundaʼg kios, o kanda wu pil mbpi pil, ywaʼg dig be na miñamla nlima ri. Ntsenda o wum ñina wu, ywelepfuo baʼg ntsenda rinwo. Gia manzi ma le bur bo kios mbvul mminlima ri. Kyuala bur na pueʼgpueʼg kyual! Kuela bo na nlima nawung, kile gia naa o kea sá wum “ñinʼga mbpa” bur ritu.

Vi pong dig naa vivia vi yi bur bo si ñina, naa mur aʼg be le mbvul na ñelepfuo. Mur aʼg limbo le. Pil ndzinii, mur balee ywe dzigsi, ñe bo yí mur Nzambi nzí tel sueʼg nwo pe naa o lunga. Kien dzinii ywog yi yaʼg tsiʼg yé ri pe naa ye lunga Krist ritu. Tsiga ngka wuwel ri, hea bibia laʼg ngka Nzambi simuʼg yé. Sá bo gio kios, ye béé.