Ngigsa 2

Puʼg gi Yesus mi nzi yu kros ri ?

Ka baʼg biangsa le tsia ñina, Kundaʼg puo ma Nzambi kile be na mala mandzinii.

Pe numa gyueʼg, vi ywua na gyueʼg mbpiangsa vú bo Nzambi. Nzambi lée nakinaa ñelepfuo mí mpée naa bitsiʼg bivii bi lánga mimbvuʼg ri, tsina ñe yu puʼg vii pe naa vi kúrga vu mimbiu ri, vi sáʼg nlar na ñe ; mbpiywue ñe limbo naa vi kyual ñe, hea naa vi yi na ñe mandzima mandzima.

Puʼg gi ñe mi miaʼgle sá ndzina ? Ñelepfuo mi mpee ndzina.

Nzambi ki naa tsiʼg yi matsie ri. Mur buama nkiera koo lin matsie bo nzí su ma yí wung, hea tsie mvur na mvur yí wung yi nambvul le tsiʼg mbeembee, nagi tsie riñe aʼg be le biluoguʼg bi sui ri. Sariye wo Yesus ñelepfuo, pfii mur yí pueʼgpueʼg wung, mi mpee naa ñe nzi yi puʼg vii.

Mafu pfie, Nzambi mi nkaʼg naa a ki yu puʼg vii. Lin Yesus mi mpan, ngkagu ma Nzambi mi nlunde lang bo ñe ; ndzina nzul, ki ngkagu riñe mi mbe dú. Yesus mi nlundele malab bal bibwyua bilal, mí mpagoo sueʼg naa a bial.

Vi pong ngka dig buraʼg bomam Yesus mí nlundele na sui ñe mí nyu.

1. Ñe mi nyu pe naa vi báʼg pfuna na Nzambi.
2. Sindi yé le vi tsiʼg. Ka vi gir sui núnga mimbiu mimvii, limbo naa vi mpeega ma nandtang Sindi yé.
3. Bo mi mponsi ñe puʼg mimbiu mimvii. Ponsi yé riye le vi tsiʼg, na gyuma vi.
4. Magyueʼg mó mí nlundele malab mí mpagoo.
5. Ne mi mpuang mbpula vii a bieʼg mbumla kros ribvuo, mbpiywue ñe mí nwelgu tsiriri ma Nzambi.
6. Bo mi nlaga na ñe, pe naa bo búama vi bo Nzambi.
7. Ñelepfuo mí nle tsiʼg yé pe naa viog vi núnga tsiʼg yé. Ñe mi tsendi mam, dzimle tsiʼg yé pe naa vi búama tsiʼg.
8. Ñe mi nliole ndtimbi ma mbpiñie bo sá sál, na mbpiñie mur laga na ñelepfuo. Vi ywua na nung ndtimbi riñe pe zir si ñina wung.
9. Ñe mi mbap ponsi vii a bieʼg nkiela li ribvuo. Mbpiywue ñe mi nkur vi, vul vi biluoguʼg bi mbiu zír vi bilua ri.
10. Ñe mi nzirga Adam mafaʼgla. Adam mataara, mur mataara, mi mbial kile be na nwuma púsi naa a saʼg mbiu. Di minsea mibio mié mí nsá naa sui nia si ñina ri. Yesus ñemur yí Adam mafaʼgla, mi mbial kile be na nwuma púsi ñe naa a saʼg mbiu. Di sui ñelepfuo mi mpee naa a ke yu kros ri kile be na to mbiu ndzinii, sui riye mí nle si ñina tsiʼg.
11. Ñe yi mataara na mafaʼgla. E yi pe naa tsig yiyia lánga bo ñe.
12. Ñe mi mbuama sui, pe naa viog vi búama tsiʼg. Giama be bo mí mpongle ñe pusi naa a saʼg ndzina, ñe mi nlimbo mam momea pe naa a bía mbala mam momea ri.
13. Ñe mi mbe mpfuuri mi mbalee gianda, le ri tsig yé puʼg ma bur mí nzinde ñe. Mbpiywue ñe mí nliole kyual yé, kaʼg muraʼg lab nsea mfii ndzinii nwaʼg be le nambvul kuga na sá.
14. Matsie mó ma yi wung, ma gyuma mabee mavii, na le vi tsiʼg yaʼg kaʼgle be na masia.

Kaʼg bvimbi mam mí nseega na lundeleo mana ! Gi ma wum lée puʼg vii ?

Kaʼg bvimbi mam mí nseega na lundeleo mana ! Gi ma wum lée puʼg vii. Nzambi ki naa ka vi bvaʼgla naa Yesus mi nyu kros ribvuo pe lundele mam rimo puʼg vii, vi mua nambvul buama miana minsea mié rimie mi ywua na mie.

Pil ndzinii, e yi nambvul be mbpi sa ki naa vi linga kaʼg minsea mindzinii vi mi nkar gyu bitsiʼg bivii ri. Di Yesus ki naa ñe mi nsil puang pe naa Nzambi ñina vi naa vi yi wung. Ngkagu riñe wo sá naa vi baʼg na mabvoʼg naa tosa yaʼg be le nambvul koo vi na Nzambi.

Mbpam ma Nzambi wo kur vi, kaʼgle mam vi sá. Sariye viaʼg be le nambvul kie mabvoʼg mbvul mvii mere ri. Dikoo, ntsenda séega bitsiʼg bivii ri, nwo wo líole naa mabvoʼg vi bir na Nzambi na kyual vi kyúal ñe, bie yi pueʼgpueʼg. Ndtimbi yi naa, ka mur ki naa a kyual mura nwó di a kile ñe ñina mbpi sa balee be na mala, a kile ñe liole kyual ; ndzina liole naa aʼg kyual le ñe pueʼgpueʼg ritu. Ka minsea mié mi fángla na bibang bié, limbo naa bibang bié ribie bie yi nziinzii, to nlima nwó giama be bo mura riñe.

Mabvoʼg vi bir bo Nzambi, na mam a kag vi ri; bie sá naa vi wúma tsiʼg mbpi a wúm naa vi tsíga, na le yaʼg vi mbvul tsiʼg tsiʼg riye. Bibel lée naa Sindi Ntanea wo le vi mbvul riñe. Sindi Ntanea yaʼg bo yí ndtimbi (líole) naa vi yi bur bo Yesus, hea len ñe mí nsa wo sá naa vi ñinʼga tsiriri.

Mabvoʼg vi bir bo Yesus ma le vi mbvul tsiʼg tsiʼg wung, pe liole bur bobea sá bo gio naa mur yi krison. Ndzina yaʼg wum le lée naa viaʼg be le ná na mbvinda ; di naa ka vi yi bokrison, Nzambi ki sá naa vi baʼg kile be na mbvinda.

Ka vi be kile sá magyuerara, a ki sá naa vi báʼg kile be na mbvinda tsiʼg yaʼg nzii.

Yesus ki naa vi yi mbpi minloo mi li. Lin vi yí bur bó, vi taare na dangle tsiʼg yé ri, koo mbpi nloo ma li wain. Mimpindi mié mi le vi bidiu vi ywua na bie, na kuel vi naa vi lúnga. Nzambi ñog ke kaʼg tsieʼg minloo miaʼg be le vi na mala, ndtang vi bvúma bibvuma.

Ka Sindi ma Nzambi tsendi bitsiʼg bivii, na mabvoʼg vi bir bo Yesus, tsiʼg yé ri na sui ñe mí nyu puʼg vii ri ; ntsenda séega bitsiʼg bivii ri wo kí liole bur naa mbvaʼgla mvii yi pueʼgpueʼg. Ngkagu riñe le vi mabvoʼg naa sá ñe mi nlundele na sui ñe mi nyu, sá riye yi vii.

Bvuma ma Sindi yaʼg le le mur tsiʼg. Mur yi nambvul be kile wanga na mam, a nziéʼg gia wuwel, di kaʼgle ye bo le vi tsiʼg. Giama be naa ka tsiʼg vii yaʼg bvuma le bibvuma, bur baʼg dzii ka vi yi pueʼgpueʼg bokrison.

Tsie nwó yi madzio, bitsiʼg bivii biog bie yi minloo. Langla pil nwo numa Mua yi ; ndtang o lúnga, ndtang o síla wun.