Ngigsa 1

Me bir kundaʼg puo. Nzambi kag vi naa ka vi yi mabvoʼg na ñe, na sá ñe magyueʼg kyual ritu ; ñe ki vi kyual, na kiere vi, na le vi tsiʼg kaʼgle be na masia, na kur vi bio ri, na vi ki tsiʼg pueʼgpueʼg nlar kyual ri na ñe.

Ywe bvaʼgla ndzina ? Ywe gyueʼg mere sá ye wum lée puʼg ye ?

Bibel lée naa vi yi mbiala pe kyual, pe sá magyueʼg, na pe tsiʼg na Nzambi pe bopil bobea, di viaʼg be le nambvul sá ye.

Puʼg gi ?

Puʼg naa taare mabila, vi yi nkoala na ñe puʼg ma mam maba:

Gi mataara, viaʼg limbo le ñe ; viaʼg be le nambvul kyual mur viaʼg limbo le.

Gi mba, vi mi mbial na minwuma mí vu mimbiu ri. Minwuma rimie mi sá naa vi báʼg kile be na tsiʼg, kile limbo Nzambi, hea kile kyual Nzambi. Minwuma mi bio rimie mi pán na sui, mabee, mam maʼg be le tsiriri, biñan, hea na mimbvuʼg mimia mi yí si ñina ri.

O ná bio vii koo vi na Nzambi ?

Tsiʼg ma koo me na me, ye bo pán na bio, nagi ye ñamgu nlar vi yí nambvul be na bur banʼga. Ndtimbi yi naa lin munung yí pfuna na mura nwó, ywa a núma gyueʼg mbpiñie bibang bié, minsea mié, ka mabuangsa mó, ma yí nambvul sá ñe bio. Mbpiywue yaʼg nlar mvii na Nzambi yí. Mbpi vi sii pfuna na Nzambi, mbpiywue yaʼg vi numa gyueʼg mbpiñie vi biele nlar vi bír na ñe.

O ná Nzambi mi nsá lin vi nkoala ma na ñe ?

Nzambi mi nzirga mur, pe nig muraʼg nlar kyual mi mbe mbe
paʼgla ma vinoo ñe. Yesus bo yí mur riñe.

Puʼg gi ye mi mbalee be na mala naa Nzambi zírga mur ?

Gi mataara, pe naa ñe sáʼg nlar na vi. Gi mba, pe naa ñe límba masusi mavii, mimbvuʼg mimvii, hea na mavumla mavii. Gi nlal, pe naa na sui ñe mi nyu puʼg vii, a bába ponsi vi mi nwyúa na buama puʼg minsea mi bio mimvii. Gi nna, pe naa ñe níga nzi pe o tsiʼg puʼg vii, na suia minsea mi bio mimvii, na nieʼg kie pueʼgpueʼg nlar yí kih sil, paʼgla ma benoo mua mur.

Luanga mam mí nsá naa Yesus yúʼg puʼg vii, yi pe liole vi naa Nzambi ponsi bio. Pueʼgpueʼg Nzambi aʼg be le nambvul be kile ponsi bio. Sui ma Yesus sá naa vi baʼg na mabvoʼg naa Nzambi aʼg miaʼgle le ndzina. A miaʼgle ponsi ñelepfuo puʼg vii, kile be naa a nsá bio ndzinii.

Sá ñe mi mbalee wum yi naa a kúra vi minwuma mi bio mimvii ri, a zíra minlima mimvii, pe naa vi báʼg na pueʼgpueʼg nlar na ñe. Sariye Bible gio naa « be mbiala wanaa ». Ndzina wum lée naa ywe mua ndzima kaʼg mur mfii, ywe tsiʼg gigia na minwuma mi bio mi zir ywe lua, ywe bir kundaʼg nlar na Nzambi.

Gi bo gio kundaʼg puo ? Nagi ye wum lée bvubvu bal bab Yesus mí mbab ponsi vii.

Bibel lée naa Yesus mi nyu, ki aʼg peega, a yi ná tsiʼg ri na nzi bi dol. A wum naa vi nunga tsiʼg yé yi kih mbvinda, tsina ñog nung tsiʼg ngkuong vii. Ka vi miaʼgle ñenge lab riye, tsina sindi yé taare na tsiʼg mañul mavii ri. Tsiruʼg tsiruʼg, tsina ye taare na vul minwuma mi bio mimvii, na sá naa vi wuma be mbpa mbpi ñe.

Suia mur nzii suao na zirga mur nzii zirga kih mbvinda, bo gio ye naa zirga wung. Pueʼgpueʼg ritu, vi ki be kih mbvinda koo lin vi ki be kile ná be si ñina ri. Di dziiri bibvuma bi líole naa mur ki be kih bvinda bi táaare na ñinʼga.

Bo gio bibvuma ribie naa bvuma ma Sindi : E yi kyual, masusi, wuwel, nana, mbpa, mbpam, mbvaʼglá, wo, kile wanga na mam. Ka vi yi bokrison, vi ki gig be mbpi viaʼg luang lée gina. Ka viaʼg be le bokrison, pil yi ná pe naa vi kánda bo Nzambi. Vi sía pfuna na ñe na nlanga Bibel, gir bio, giaʼgle na bvumle Nzambi.

Viaʼg be le nambvul sá naa bvuma ma Sindi lúnga bo vi na mbvul mvii mere. Koo Sindi Ntanea wo yí nambvul sá ye. Ñe sá ye lin vi liole naa vi kyual Krist.

Bibel lée naa vi ywua na bab kros mvii na leble Yesus. Bibang ribie bi yi yiguʼg líole sui ma tsiʼg ma koo me na me. Yiguʼg vur mbpi Yesus mere mi mbab kros nwó (ndtimbi ma pfuga!), na yu a kiel tsina, viog yaʼg vi ywua na sá ndzina na gyu tsiʼg ma koo me na me.

Mala ma gi ye bir ? Tsiʼg ma koo me na me vi bir, ye vumla na nwuma ma Nzambi. Yesus wum naa vi sáʼg magyueʼg mandzima mandzima, vi baʼg na mabvoʼg kih dzii botsia. Ñe wum naa vi gira tsiʼg ma koo me na me, vi wúma be na Nzambi. Mbpiywue vi yi nambvul liole n̍̃e naa vi kyual ñe.

Lin vi sil vilebopfuo si pee naa Nzambi wo zirga pfii sá le vi masusi, Nzambi ñog le yaʼg vi mbvul na nwuma pe sá ñe magyueʼg. E yi mbpi sá ki naa Nzambi zirga mpebe vi yóo. Yesus bo yí mpebe vi yóo duo mbpi duo, na ke pan duo mafaʼgla. Ye wo le vi mbvul bungsa naa lin a lée vi naa vi kyúala bosiang bovii, ñelepfuo bo kí vi kuel naa vi báʼg na mbvul kyual bo.

Nlar vi bír na Yesus wo yí nlar balee be bvuo pe minlar vi yí nambvul be na mie, nagi nwo yi vi mañul ri. Nlar rinwo ntsendi tsiʼg yang, nwo ki yaʼg tsendi tsiʼg ye, ka ywe miaʼgle be mabvoʼg na ñe hea na sá ñe magyueʼg kyual ritu. O ywa, ka ywe kyu, ñe ki ywe wal.

Kien ndzinii ywe pfunde naa tsiʼg wanaa riye sáʼg naa ywaʼg dig ná tsiʼg mbpi ywe nzí kua na tsiʼg tsiʼg. Di, me yi na masusi na lée ywe naa kyual me kyual Nzambi na sá ñe magyueʼg, ye nsá naa maʼg dig ná be na mbpab nzí sá sá naa pil mbpi pil, me yi mbpi sa ki naa me nzii vumla na melepfuo.

Nte mbpi nte vi yí si ñina ri, ye ki be na bopil mabuangsa ma bio ma bire vi minlima ri, hea ye ki be na bopil vi sá mimbvinda. Di kyual vi kyúal Yesus sa naa mabuangsa mabio maʼg dig vi balee bire minlima ri, hea vi báʼg nambvul lul mo. Nzambi sa mbpiywue pe naa vi báʼg nambvul suse na ñe na be na vi, vi báʼg nambvul suse na si ñina, hea vi súsa na nlar wung a nzí vi le.

Ngkagu bálee ngkamla naa vi míaʼgla yi ñi lée naa Nzambi yi nambvul tsendi bitsiʼg bivii. Di yog bieʼg pueʼgpueʼg naa Nzambi yi nambvul tsendi bitsiʼg bivii. E yi pueʼgpueʼg. Ndzina nzul, kundaʼg puo kile ná be nambvul be kundaʼg puo.

Di puʼg gi ri bokrison bvubvu bo tsiʼg tsiʼg yaʼg be le mbpa ?

Krison mbpi krison yi na mbvul tsiʼg kile sá bio. Di pil ndzinii, vilebopfuo vi bina tsiʼg ndzina. Pil ndzinii, to vi giama be bokrison, vi ke sueʼg na pee bio, zieʼg pee Yesus.

Bur bondzinii bo pee naa bo sá bio, nagi bo buangsa naa tomur aʼg be le nambvul tsiʼg kile sá bio. Pueʼgpueʼg naa ye ngkamla naa mur tsíga kile sá bio, nagi ye dzii naa pil mbpi pil, o síla ñul nwo ñenywua sueʼg ma Nzambi.

Gi ye wúm lée ?

Lin vi nsil ma mañul mavii sueʼg ma Nzambi, vi ywua na ke sueʼg na sil mañul mavii sueʼg nwó. Ye ywúa na séega pil mbpi pil, nagi e yi mbpi sa ki naa tsiʼg wum naa o búangsa sa koo ywe na ywe. Bibel gio ye naa mabuangsa ma vú pee tsiʼg mbiu ri. Mabuangsa maywema, vi bi mo taare duo vi bial, na ke pan duo sui.

Ka vi bvaʼgla Nzambi, vi biéʼg mabvoʼg na ñe, ka vi gir bio, na giaʼgle, na láng Bibel, na nung mbvul bo bokrison baʼnga, o ywa, Sindi ma krist taare na tsendi minwuma mimvii, na kur vi tsiʼg mbiu ri.

Ye nung pil. Di ywaʼg dig bil na tiaʼg. Ywaʼg dig yaʼg tio tsina pe liole naa ye bo sá naa o báʼg kile ke sueʼg.

Lin vi le Nzambi bvúmá, ye le vi masusi na wuwel dzi puaʼg nte. Baʼg buama le kaʼg wuwel na masusi rimo numa fii si ñina ri. Ka vi gir bio, yaʼg be le koo napuʼg naa viaʼg wum le sá bio ; di vi sá yaʼg ye nagi vi wum naa dzílé vii vuʼg bo Nzambi.

Sál ma Nzambi yi sál bvúmá, Nzambi wum naa vi núnga ngkoo na ye. Lin vi nle ma Nzambi bitsiʼg bivii, a sá naa vi sáʼg naa bur banʼga bo búama kundaʼg suo a sá na mua mur (bum kundaʼg puo) hea vi gígsa bur mbpi bo ywúa na tsiʼg (be bogig).

Sá Nzambi le vi kee balee be mbpa lin vi buama ye, viaʼg be le nambvul be kile ye koo na bur banʼga. Lin vi nzí kieʼgle na ñina naa Ntsi yi mbpa, ye sá naa vi wúma ye lée bur banʼga, pe naa bog yaʼg bo límba wungia, hea na masusi vi nzí buama.

Kundaʼg puo (puo balee be ñenge puo !) ma Nzambi ná bo ñina : Nzambi kag vi naa a ki vi kyual, na kiere vi, na le vi tsiʼg yaʼg kaʼgle be na masia, na vul vi bio ri, hea na sá naa vi báʼg na pueʼgpueʼg nlar suo na ñe ; ka vi be mabvoʼg na ñe, hea ka vi sá ñe magyueʼg kyual ritu. Ka vi dzi na ñe kih magyuerara nakepan masia ma tsiʼg vii, Nzambi kag naa a ki vi le ñul wanaa, kile be na biluoguʼg bi vú minwuma mi bio mimvii ri. Kile ná be na sui, nlunda na mabvoʼg, hea naa vi ki tsiʼg na ñe pe bopil bobea.

Puo bio ñog yi naa, bur bo bína len ma Nzambi bo ki pfuga ponsi mbeembee, bo ki koala na Nzambi. Vivia vi ywua na ponsi ywue puʼg ma bio yí vi mañul ri.

Kundaʼg puo ma Nzambi na puo bio, ndzina wum lée naa sá séega lin vi bína Nzambi, a sá naa kundaʼg puo báʼg pueʼgpueʼg bálee be na mala bitsiʼg bivii ri.

Vi yi si ñina ri pe bvumle Nzambi na pe tsiʼg na ñe pe bopil bobea. Pil ndzinii, vi buangsa naa vi ywua na pee paʼgla ma tsiʼg súsgu vi, na tsiʼg súsgu Nzambi. Di pueʼgpueʼg yi naa lin vi tsiʼg leble minwuma mi bio vi bír, yaʼg le le vi masusi ma dzi puaʼg nte. Lin vi miaʼgle bio, ye ki vi le bvuʼg minlima ri. Ye ki ñamgu simuʼg vi sím vilebopfuo. Ye ki sá naa vi báʼg bilua bi mam ma dziele vi, mam ma bio. Lin bio wo páng vi, ye vul vi masusi, ye zieʼg vi wuwul, ye tel vi vilebopfuo, ye zir vi bilua.

Lin vi pee be bilua bi mbpa ma Nzambi, kaʼgle be bilua bi bio ; Nzambi yi na vi, hea ñenge len ñe mí nsa vi yi na vi. Sariye le vi masusi na wungia, hea tomur aʼg be le nambvul vul vi mam maywema.̀

Ye dzii naa vi láʼg ñe sá yiyia. Vi láʼg ñe maluo momea vi sá ; vi búama nkiera ñe kíere bur, tsiʼg yé, hea na mbpam nwó.

Pe be kile ye wusa, o ywua na buangsa Ñenge Ndtande ma Nkurga :

O Yesus ywe mi nyu kros ri
Ywe mi mpeega pe tsig vi
Bong kiere mimbui miang, o Ntsi
Ywe yi suo nwang, bà’g ya’g ntsig nwang
Bong tsendi tsi’g yang, la’g me nlima nwanaa
Me wum tsi’g pu’g ye, o Ntsi