Ngigsa 3

Sá o ywua na limbo bal mam manʼga momea yi naa, Yesus mi mpeega vu boyul, ye yaʼg wo le vi mabvoʼg. Ka Yesus mi mpongle peega, vi kile be nambvul limbo tsiʼg yé. Tsiʼg yé yí bo vi, ye wo yí luanga malen ma nenii ñe mí nsá vi.

Ka vi tsiʼg na Nzambi, e yi yaʼg nandtang sui ñe mi nyu. Sui riye wo zír vi wung sueʼg nwó. Tsiʼg riye numa ñinʼga napuʼg ñe mi mpeega vu boyul, na ke tsiʼg bvuo, na nzi tsiʼg bo vi yé, pe bopil bobea. A kag vi naa pfie ma sui vii, mbpiywue vi kí tsiʼg pe bopil bobea. Bo ki vul tsiʼg vii mimbvuʼg gina, na le vi tsiʼg mbeembee.

Yesus yi pueʼgpueʼg Nzambi, a yi yaʼg pueʼgpueʼg mur. Adam benoo Eve, munung mataara na mura mataara, bo mi mbe naa bo tsiʼg mbeembee, di ki mabuangsa moo ma bio maʼg pirgu bo. Mbpiywue yaʼg bio pirgu vi. Bio wo sá naa vivia vi síla yu. Yesus ñog yi mbeembee, nagi aʼg pónglé sá bio naduo. Sariye yaʼg wo liole vi naa ñe mi mbe Nzambi, nagi koo Nzambi waʼg be le na mbvida ndzinii.

Yesus mi nyu mere, di kaʼgle bio mi ngyu ñe.[10] Ñelepfuo mí nle tsiʼg yé, hea sui mi mpongle be nambvul bi ñe minkuma nagi naduo, aʼg pónglé sá mbvinda. Tsiʼg wung yé mí nle ñe tuu nieʼg nung tsiʼg yé.

Yeri a nieʼg nung tsiʼg yé.

Yesus mi nieʼg pan pe o tsiʼg pe liole ngkangkal yé, naa a yi Nzambi, naa a yi mur yí kih mbvinda, naa a yi nambvul le vi tsiʼg, a yi yaʼg nambvul peegi vi vul vi boyul.[14] Ka ñe mi nnieʼg pan, e yi yaʼg pe naa vi baʼg na mbvul tsiʼg na ñe nlar yí nñimla ri.

I mpong ngka ye soanga buangsa.

Viaʼg ywua le na kiamsa buangsa naduo naa vi yi vilebopfuo, nagi a tsiʼg vi mañul ri. Vi yi nambvul be na ñe pil mbpi pil, duo mbpi duo. Vi yi nambvul giaʼgle na gyueʼgle mabuangsa mó minlima mimvii ritu. A limbo mabuangsa mavii, a kyual vi. A le vi mbvul tsiʼg kih mimbvinda. Mbpi ñe, vi yi nambvul tsiʼg kyual ri, masusi ri, wuwel ri, dzisoo ri, be na kundaʼg bigiama, mbpa ri, tsiʼg yí kih magyuerara ri, wo mbpi a wo, hea kile wanga na mam. Lin vi buama tsiʼg vii bo ñe, a le vi tsiʼg mandzima mandzima.

Bibel ki naa ka vi yi pe o si pe tsiʼg nlar kyual ri na Yesus. Vi ywua na balee be pfuna na ñe bal tang vi yí pfuna na mur mfii ñenywua. Kyual ñe bal kyual vi kyual bur banʼga, bal kyual vi kyúal mam mafii si ñina ri. Vi ywua na sá ñe magyueʼg na bvumle ñe bopil bobea.

Mbpi vi tsiʼg pe kyual Yesus na pe be luanga na ñe, Bibel gio bokrison naa « mura » ma Krist. Bible ki yaʼg naa mur mbpi mur lága na Yesus linga mpirga. Vi ki ke faʼgla mabuo ma Yesus ri. Mur zínde Yesus aʼg be le nambvul ke faʼla mabuo ma Yesus ri; a ki dzi nkoala na Yesus pe bopil bobea.

E yi kaʼg bio bur baʼg balee le buangsa. Bur bvubvu baʼg limbo le naa tsiʼg yiyia na masusi momea, bie vu bo Nzambi. Bonziinzii bo mam momea ma súsgu vi si ñina ri, vi buama mo nagi ñelepfuo bo gir naa vi búama mo. Ka vi nyu ma, vi kaʼgle ná be na mam maywema momea. Tsina, vi ki be na Yesus masusi ma yí mbeembee ri, ka naa vi ki be bio yí ngkyuam makoala ri, numa bo bviangla na sui.

Vilebopfuo vi ñina naa ñenge numa fii yaʼg be le si ñina ri mbpi sa ki naa lin o yí mabúo ma Yesus ri. Wuwel na masusi vi táare na limbo dziiri bo ñe, ye wo balee be ñenge lab vi yí nambvul limbo. Mur mbpi mur ntsiʼg ma pueʼgpueʼg nlar na Yesus ri, yi nambvul lée ywe naa Yesus yi na mala bal banga, minkung, mon, lab bigyuong, bosuo, bal mam momea.

Mataara, vi yi nambvul pfunde gir Yesus nii bitsiʼg bivii ri. Nagi a panʼgu béé bio yí bitsiʼg bivii ri, a pusi vi naa vi síla mañul mavii sueʼg nwó. Di yog biéʼg naa ka vi sil mañul mavii sueʼg nwó, a gyuma vi na wuwel ngkang yé, a le vi mbvul dzi ñimla, hea a le vi mbvul naa vi lúnga.

Ka o leble Yesus na sil ywelepfuo si sueʼg nwó, a ki zirga masusi mo manenii, a ki tsendi tsiʼg ye, hea a ki ywe zir wung.

Tsina pfie ma sui ye, o ki ke paradi yí mabuo mó ri.